Ukufuthelana kuya phambili eMelika kulandela udlakela olwadalwa ngabasekeli bakaMongameli Doland Trump edale lephalamende ngeviki edluleyo.
Lokhu kubangele ukuthi amalunga alelidala ethese uTrump icala lokuphehla umvukela kuthange ngohlelo lwe-impeachment.
Amalunga ebandla lamaDemocrats edlula amakhulu amabili abambane lawebandla likaTrump elamaRepublicans amathesa lelicala.
Idale leSenate yilo elizamthonisisa kumaviki ambalwa alandelayo lanxa nje eyabe esesukile embusweni.
UMnu Joe Biden yena uzafungiswa ngoLwesithathu ngeviki ezayo ukuqala umsebenzi njengoMngameli weMelika omutsha ngemva kokubhuqa uTrump kukhetho lanxa esithi waqilwa.
Kugcwele amasotsha ephalamende, eWashington DC lapho uBiden azathathela khona isifungo.
Uhulumende uthi uthumele amasotsha azinkulungwane ezingamatshumi amabili, 20,000, ukuyalondoloza ukuthula ngoba ulokwesabela ukuthi abasekeli bakaTrump bangahlasela njalo.
Ingcwethi kwezombusazwe uMnu Effie Dlela Ncube utshele iStudio 7 ukuthi uTrump wazokhela amalahle ekhanda. Ngakho, uthi umzenzi kakhalelwa.
