Kulokuxokozela okumangalisayo kubandla leZanu PF kulandela ukumiswa umsebenzi, uCleveria Chizema, okuthiwa wabanjwa xhaka elamaphepha alotshwe okuveza ukuba abalandeli bebandla leli bafuna uRetired General Constantino Chiwenga athathe isikhundla sika Mongameli Emmerson Mnangagwa.
Amaphephandaba ambalwa, agoqela eleStandard, abika ukuthi ukumiswa umsebenzi kuka Chizema, owangena kubandla leZanu PF lisungulwa ngomnyaka ka1963, kuveza ukuthi kulokudonselana kwamandla phakathi kuka Mnangagwa loChiwenga.
Abalandeli baka Chiwenga kuthiwa babefuna ukusekela abantu ababefuna ukutshengisela emigwaqweni ngoLwesihlanu bekhonona ngobukhohlakali lokunye okuhluphayo kwele Zimbabwe.
Kasenelisanga ukukhuluma loMnu. Patrick Chinamasa, obambe okwamanje isikhundla sesikhulumeli sebandla leli, obengaphenduli umakhalekhukhwini wakhe.
Kasenelisanga njalo ukuxoxa ngodaba lolu loMnu. George Charamba, isikhulumeli sikamongameli, kanye lomabhalane kahulumende obona ngokwethulwa kwemibiko.
Sixoxe loMabutho Moyo, okuhlangothi lwabatsha kubandla leZanu PF, othi ngamanga aluhlaza tshoko ukuthi uMnangagwa loChiwenga bayalwa.
Kodwa uNkosazana Nomthandazo Nkomazana, olwela ilungelo likazulu, uthi baazabulalana kubandla leZanu PF bebanga umbuso.
