amalinks wokungena

Breaking News

Kuzamele Sibophe Ziqine Ekudlaleni Kwethu: Kutsho uAriel Sibanda


Ariel Sibanda ukaputeni weqembu lenguqu eleHighlanders

Ukaputeni weqembu lomdlalo wenguqu ele Highlanders uAriel Sibanda uthi akusacatsheki ngomunwe nxa iqembu lingadlali kuhle ngemva kokuthola kwalo usekelo lwemali oluvele kwabenkampani eyeSakunda Holdings, esithi sokuzamele babophe ziqine bengafuni ukuyangisa.

USibanda uthi umlandu ususalele abadlali njengoba indubo ezidalwa yikuswelakala kwemali zingasekho kuqembu le Highlanders ngemva kokuba lithole usekelo lwezigidi zamadola luvela kwabe Sakunda.

“Ukunqoba sizanqoba kodwa akusoze kube lula ngoba wonke amanye amaqembu azakube esithi iqembu le Highlanders selilemali yikho sifuna ukulinqoba. Labanye abadlali sebefuna ukubuya bezodlalela iqembu le Highlanders yikho lapho esizadlala lamaqembu abo bazabe befuna ukubonakala.

Singakhangela lapho ebesikhona besihlala sikhala ngemali langokunye okutshiyeneyo kodwa khathesi konke lokho sesikutholile. Sekukithi ke thina abadlali ukuthi siziphatha njanji ukuze sifeze zonke izifiso zethu ekucineni,” kutsho uSibanda.

Iqembu le Highlanders lithole usekelo lwemali oluvela kunkampani ethengisa amafutha ezimota eye Sakunda ensukwini ezedluleyo njalo lolo sekelo lizaluthola okweminyaka emithathu.

Phezu kwaleyo mali okubikwa izasetshenziswa ukubhadala abadlali lokubhadalela ezinye indleko ezibhekane leqembu, ukaputeni kanye lomqeqetshi beqembu bathole imota zokusebenzisa okuyinto etshiye umfoka Sibanda elokhu ezincweba ukuze abe leqiniso elokuba akusilo phupho.

“Ngithabile kakhulu njalo into leyi bengingayicabangeli lami, ngisele ngimangele kodwa ngithabe kakhulu.

Lokhu kunginika amandla awokuthi ngibuyele enkundleni ngiqinile. Kutshengisa futhi ukuthi kulabantu abalendaba lathi okumele sibadlalele siqinile,” kutsho uSibanda.

Iqembu le Dynamos lalo lithole usekelo olufanayo luvela kwabe Sakunda.

Lolusekelo luze ngesikhathi amaqembu womabili lawa ekhangelane lobunzima bokuthola imali njengoba ezemidlalo bezimisiwe ngenxa yobhubhane lwe Covid – 19.

Lalapho umdlalo webhola kusigaba se Premier Soccer League oke wadlalwa khona bekungavunyelwa izibukeli okutsho ukuba amaqembu abengayenelisi ukubhadalisa abafuna ukungena enkundleni azitholele imali.

Amaqembu adlala kusigaba saphezulu aseqalile ukuzilolonga njalo imidlalo ikhangelelwe ukuba idlalwe ngenyanga kaMfumfu.

Facebook Forum

XS
SM
MD
LG