Abanye abantu abahlala koBulawayo bathi ukutshengisela okwenziwa ngumanyano weMDC Alliance kuphuzile kakhulu ngakho-ke akusoze kwaphuma lempumela abayifunayo.
Umanyano weMDC Alliance uqoqa ukutshengisela okuzakwenziwa eHarare kusasa besithi bafuna ukuthi uhulumende aguqule imithetho ekhangela ezokhetho ukuze amabandla wonke ezombusazwe enelise ukukhankasa kuhle njalo athole amathuba alinganayo emsakazweni kanye lakumabonakude emsakazweni weZimbabwe Broadcasting Corporation.
Omunye walabo abasekela ukutshengisela lokhu nguMnu. Mazezele Mwembe, othi ukutshengisela komanyano weMDC Alliance uvumelana lakho ngoba ubona engani amabandla aphikisayo ayancindezelwa.
“Ngiyavumelana lokuthi abe MDC bakwenze lokhu ngendaba yokuthi amavoti akhona awaqedakali, njalo badonsela kibo. Okunye amavoti akhona aphuzile ukumenyezelwa, kukhanya engani abantu laba bafuna ukusincindezela. Zonke izinto zindonselwa khonale emashoneni.”
UMnu. Lazarus Mukombe, ongumlandeli webandla leMDC T ekhokhelwa nguMnu. Nelson Chamisa, uthi kuphuzile ukutshengisela lokhu lobanje eveumelana lakho.
“Ngendaba yonale ekhulunywayo okweqiniso soku too late kwakufanele bakwenze kuleskhathi. Singahamba sigijime emgwaqweni sitshengisele kodwa soku too late. Mina ngingoweMDC ekaChamisa ngithi kuright ukutshengisela.”
UMnu. Knowledge Mukhuli laye uthi ukutshengisela kuqondile. Ugcizelele esithi indlela uhulumende aqhuba ngayo ezokhetho khathesi kwenza engani ngokwecele elilodwa khona kungokwelizwe lonke.
“Into eyenzakalayo ayikho right ngoba lokho ngokwelizwe lonke kumele sikuthakazelele sonke sifree. Kungenziwa engani banye abantu balamandla kulabanye …”
Kodwa uNkosikazi Martha Ncube uthi kaboni ukuthi ukutshengisela lokhu kuzasiza ngoba sesifikile isikhathi sokhetho.
UNkosikazi Ncube uthi kumele umanyano weMDC Alliance ukhangele ukukhankasa hatshi ukuchitha isikhathi ngokutshengisela.
“Lokhu okwenziwa ngabantu beMDC angiboni ukuthi kuyanceda ngoba isikhathi sesihambile kumele bakhankase kodwa bona badlalisa iskhathi bedemonstrator.”
Amalunga ebandla leMDC-T akoBulawayo lawo ayalungiselela ukuthi exhase abaseHarare ngokutshengisela belapha koBulawayo.
