amalinks wokungena

Breaking News

Kuzathakazelelwa Usuku lweWorld Radio Day Kuvulwa Umsakazo weNtepe Community Radio Station


EleZimbabwe lonyaka linanza usuku oluqakathekisa imisakazo yezabelo lilomsakazo wakuqala waloluhlobo osulungele ukuya emoyeni owe Ntepe/Manama Community Radio Station.

Abenhlanganiso ekhankasela ukusungulwa kwemisakazo yezabelo eyeZimbabwe Association of Community Radio Stations (ZACRAS) bathi kuyabajabuliswa yikuthi lonyaka kuyakuthi kufika usuku lokunanza ukuqakatheka kwemisakazo olweWorld Radio Day mhlaka 13 Nhlolanja, ilizwe selilawo umsakazo wakuqala wesabelo.

Obona ngenhlelo zeZACRAS, uMnu. Jerry Zingwevhu, uthi balethemba lokuba kuzovulwa eminye embalwa esikhathini esilandelayo.

Ulandisa kabanzi ngesibanga abomsakazo weGwanda asebefike kiso.

“Sesikhangelela ukuthi iNtepe isibhadalile indleko zayo zokuthi ithole isicoco esingathi yi90,000 Bond. Besesiseba ukuthi mhlawumbe ilanga elokuthi bahlawule ekade lingu 5 Nhlolanja lingafika bengakahlawuli but siyakujabulela ukuthi bahlawulile. Ngakho-kw sikubona engathi ngumdlalo esiwunqobileyo njenge ZACRAS ukuthi lathi sikhankasele ama-community radio ukuthi asakaze. Besifisa ukuthi nxa sitshayisana leWorld Radio Day yalonyaka kutshayisane lokunikwa kwelunga lethu iNtepe Manama Radio Station, isicoco sokuthi basakaze. Sikhangelele njalo ukuthi sekuzakuba lomsakazo eNtepe eManama.”

UMnu. Mvelo Zondo, isiphathamandla somsakazo weNtepe-Manama Community Radio Trust osesigabeni seMatebeleland South, uthi lanxa imikhankaso yokuthola amalayisensi okusakaza ithethe isikhathi eside, balemukela ngenjabulo ithuba lokuba ngumqali siziba kulumsebenzi.

“Eleven years sigijimisa lelo cence lokuthi sisakaze. Lokhu kujabulise kakhulu kubanikazi bomsakazo izakhamizi. Bajabulile kakhulu besizwa ukuthi bazakuba lomsakazo wabo oweSiSuthu njalo ozasakaza ngeSiSuthu leSiNdebele kanye lezinye indimi ezingapha emhlubulweni weMaNdebeleni ngoba akula network eye-radio lapho okubamba khona iZBC leminye imisakazo bona okwakhathesi bebethembele kuStudio 7. So, bajabule kakhulukazi ukuthi sebezafaka ezabo inhlelo eziqondana lamasiko abo njalo zisakazwa ngabantu baleso sigaba.”

Esinye njalo isiphathamandla seNtepe-Manama Community Radio, uNkosazana Siphathisiwe Ncube, uthi kuyajabulisa ukuba sebezokwanelisa ukutholisa umphakathi wesabelweni lesi indaba zalumango.

Lokhu kusekelwe ngesinye njalo isiphathamandla esiphatheke kumikhankaso yokulwela ilungelo loluntu, uMnu. Ndaniso Mpande, isakhamuzi seGwanda.

“Sesizayanelisa ukuthi lathi lapho esikhona sikhulume umhlaba usizwe kulokho esiyabe sikhala ngakho lalokho esiyabe sikubuka, lalokho esiyabe sizama ukuthi sikwenze. Sekulula ekuthini sithole usizo oluvela loba ngaphi sikhonapha eGwanda, singazange sisukume salulanda lapho oluyabe lukhona kodwa siyenelisa ukuthi sikhulume sikhonalapha lapha esikhona, kuyintuthuko, kuyasijabulisa kakhulu lokho.

“Siyabonga kakhulu. Siyakhumbula kusukela kudala oRadio Dialogue bezama besehluleka, bekhankasa besenzani, bencitshwa. Bonke bona labana ababephathekile kuwona lowana umkhankaso, namhlanje sibatshayela ihlombe ngoba yibo abasunguli balinto, ilizwi labo selize lazwakala.”

NgoMpalakazi nyakenye abeBroadcasting Authority of Zimbabwe batholise amalayisensi imisakazo emithathu yezabelo ebalisa oweMbembesi Development Trust ozosebenza ngegama lokuthi Ingqanga FM, iNtepe-Manama Community Radio Trust kanye leNyangani Community Radio Trust ozasebenza ngegama lokuthi Nyangani FM.

Uhulumende kaMongameli Emmerson Mnangagwa uhlezi esithi uzimisele ukuwavula amagagasi yande imisakazo labomabonakude esithi eqale ngemithathu le ehlangothini lwemisakazo yezabelo.

XS
SM
MD
LG