Izihlobo, abangane labalandeli bebandla leMovement for Democratic Change ngoLwesine bathe gwaqa eHarare Show Grounds emkhosini wokukhumbula umuyi uMorgan Tsvangirai owabhubha mhlaka 14 Nhlolanja ngomnyaka ka2018.
Lumkhosi oqoqwe libandla leMDC lomdeni kaTsvangirai ogoqela umfelokazi uElizabeth Tsvangirai labantwana bakhe.
Inengi elikhulume emkhosini lo ngempilo kamuyi belimncoma okwamagama liveza ukuthi limkhumbula njenge qhawe elenelisa ukumelana lombuso woncindezelo kaMnu. Robert Mugabe, owasuswa esikhundleni libutho ngomnyaka ka2017.
Ilunga ledale leSenate, uNkosikazi Dorcas Sibanda, owasebenza loTsvangirai esakhokhela inhlanganiso yezisebenzi eyeZimbabwe Congress of Trade Unions, uthe kulusizi ukuthi izisebenzi namhlanje zibhekane lenhlupho ezinengi ngoba akula ozabamela ngendlela uTsvangirai owayebamela ngayo.
Ekhuluma emkhosini lo, umkhokheli weMDC uMnu. Nelson Chamisa uthe uTsvangirai wayeliqhawe lamaqhawe.
Kubikwa kuzaba lomunye umkhosi wokukhumbula uTsvangirai ozakwenzelwa lapho adabuka khona eHumanikwa esiqintini seBuhera.
UTsvangirai wayelesifo semvukuzane.
