Annastacia Ndlovu
Amankampani adlula amakhulu amathathu lamatshumi amabili – 325 – asembukisweni weHlanganani-Sanganai Tourism Expo owenzelwa koBulawayo emagcekeni awe Zimbabwe International Trade Fair koBulawayo.
Kulankampani angamatshumi ayisikhombisa lesikhombisa – 77 – alempahla etshiyeneyo embukisweni lo owenziwa minyaka yonke.
Umbukiso lo uvulwe okusemthethweni ngoLwesine ngumsekeli kamongameli, uRetired General Constantino Chiwenga, okhuthaze abantu ukuthi basebenze kakhulu ukwenzela ukuthuthukisa ilizwe leZimbabwe.
Osomabhizimusi ababukisayo bayajabula ngebhizimusi abalithole lamhlanje. Lokhu kugoqela njalo amakhansili anjenge dolobho lakoBulawayo.
Isikhulumeli sedolobho leli, uNkosikazi Nesisa Mpofu, uthi, “Silapha ukuzobukisa imvelo kaBulawayo njalo bakhona abantu esisebenza labo ekubukiseni imbali lemvelo yethu ababalisa uMnu. Phathisa Nyathi isazi sembali.”
UNkosikazi Sukoluhle Nkomo oweMatilinda Lodge uthi ulethemba lokuthi bazasuthiseka ngabakwenzayo embukisweni lo.
“Lamhlanje ibhizimusi liphansi ngoba lilanga lokuqala kodwa sikhangelele ukuba lalo kungeza amaInternational buyers.”
UMnu. Zondani Phiri, omunye wababukisa umsebenzi wezandla wezokubumba, uthi ngokwakuqala ukungena kulo umbukiso.
“Siyaqala ukubukisa lapha, kodwa sikhangelele ukuba lebhizimusi njalo silapha sibukisa imisebenzi yethu yezandla.”
Abesigaba seMpumalanga kwele South Africa bayabukisa imvelo yabo. uMnu. Nkululeko Ndlovu uthi konke kuhamba kahle njalo abaqali ukuzobukisa.
“Umbukiso uhamba kahle lamhlanje njalo asiqali ukuzobukisa lapha. Size lapha ukuzobukisa imvelo yethu njalo sesithe sathola ibhizimusi.”
Umbukiso weHlanganani/Sanganai walonyaka uqhutshwa ngaphansi kwesihloko esithi ‘Africa's Premier Business Exchange’.
Uqoqwe yinkampani kahulumende eyeZimbabwe Tourism Authority ngaphansi kogatsha lwezokwethekelelwa kwelizwe.
