amalinks wokungena

Breaking News

Bulelani Lobhengula Khumalo: Ngizalwela Konke Okufunwa Ngabantu


INkosi uBulelani Lobhengula Mzilikazi Khumalo wenza imbizo eGoli.

UBulelani Lobhengula Khumalo, owakhethwa ngumdeni wakoKhumalo ukuthi athathe ubukhosi beNkosi uLobhengula kaMzilikazi kaMatshobana Khumalo, izolo uqhube imbizo yabadabuka kwele Zimbabwe eJohannesburg lapho azethule khona okwakuqala.

Imbizo le yenzelwe eBerea Par eJohannesburg lapho obehuhaywa inkosi njalo kusinwa ngendlela yesintu santolontolo.

UBulelani Lobhengula Khumalo utshele umbuthano lo ukuthi njengenkosi yabo uzenza konke ukuvikela uMthwakazi kokho konke okuhlupha uzulu.

“Imessage engingayinikeza abantu bakithi yikuthi bazi ukuthi banenkosi yabo, banomuntu ozohlanganisa isizwe sakithi, banomuntu ozabavikela kuzinto ezinengi ezenzakalayo, Ukuhlanganisa abantu sibeyimbumba, sibe yingxenye yenkinga zabantu bakithi.”

Uthe okusemqoka kuye ngamaqhinga okuphucula uMthwakazi ukuze kuqedwe indlala, ukusweleka kwemisebenzi lezinye izinto ezihluphayo okwamanje.

Lihlezi phansi ibutho leNkosi uBulelani Lobhengula Khumalo ngesikhathi kulembizo yenkosi eJohannesburg ngoMgqibelo.
Lihlezi phansi ibutho leNkosi uBulelani Lobhengula Khumalo ngesikhathi kulembizo yenkosi eJohannesburg ngoMgqibelo.

“Silungisa amahlelo okuthi silwele indaba yabantu bakithi, on a day to day basis, asilali ebusuku. Indaba yethu yikunivikela. Sifuna ukuphuhlisa isizwe sakithi at every level be it from agricultural to ukuthi abantu bathole amagetsi. Lamanje ngisebenza le UN ukuthi sibe namaprojects on the ground like solar and renewable energy nje in general ukuthi abantu babe nogetsi emakhaya and basic things like water as well.”

Induna yeNtabazinduna, uNhlanhlayamangwe Ndiweni, laye ubekhona kulo umbuthano. Lobanje inkulumo zakhe emavikini edluleyo zimlethele udlakela lwabathile ebandleni leZanu PF zaqubula lamahlebezi okuthi kungenzeka asuswe kules’isikhundla, uNdiweni uthe akekho umuntu ozomvala umlomo nxa sekufika endabeni zokulwela uMthwakazi.

“Libona engani siyadlala yini. Libona engani izinto zilula yini. Makhosikazi nxa ubaba engavuki elele ethe bhuqa kuthutsha ingozi leyi akelimkhahlelenje kancane. Limvuse kancane.”

UMnu. Junior Ngwenya, ovela eMaphisa, ngomunye wamakhulu abantu abebethabe bemanzi te ukubona iNkosi uLobhengula.

“Ngizizwa ngiledlabuzane kakhulu, inkosi okaNjube okaLobhengula, iqanda lengwenya elafukanyelwa eCologne lize lavela lamhlanje ebantwini balo sithi thina hayi wonke uMthwakazi awusondele nansi inkosi yethu ifikile, asiyipheni amandla lokuyisekela kuyo yonke imizamo eyenzayo.”

Kodwa-ke abannye bathi balokhu belombuzo wokuthi kahle kahle yiphi inkosi yoqobo koMthwakazi njengoba bakhona abanye labo abaphethe isicoco esifanayo.

Udaba Esilethulwe NguBenedict Nhlapho
please wait

No media source currently available

0:00 0:07:25 0:00

Facebook Forum

XS
SM
MD
LG