amalinks wokungena

Breaking News

Ikhomishini Yokukhumisana Umlotha Yenza Umhlangano Lamabandla Ezombusazwe


FILE: Abanye abantu abavota ngomnyaka ka2013 eHarare.

Abekhomishini ebona ngokukhumisana umlotha eye National Peace and Reconciliation Commission ngoLwesithathu bahlangane lamabandla ezombusazwe bezama ukuphuma lamaqhinga okulungisisa indaba zokuxabana lokungezwani elizweni ikakhulu ubudlwangudlwangu ngesikhathi sokhetho, kanye lenkulumo ezidala inzondano.

Amabandla angene umhlangano lo agoqela eleMthwakazi Republic Party, iZAPU, MDC-T ekhokhelwa nguNkosikazi Thokozani Khuphe, iZimbabwe Republic Democratic Party (ZRDP), Zimbabwe Economic Freedom Fighters (ZEFF) lePeoples Democratic Party.

Laloba umhlangano lo ubujonge ukuhlanganisa amabandla ezombusazwe, ibandla elibusayo eleZANU PF belingabuyanga njalo amabandla lawa asole ukungabi khona kwalo besithi yilo eliqala ubudlwangudlwangu.

UNkosikazi Thamani Moyo, olilunga leMDC-T ekhokhelwa nguMaKhuphe njalo engukhansila kaWard 15, ngomunye wabasole ukungabi khona kwebandla leZANU PF.

Omunye njalo obekulo umhlangano uNkosikazi Tiisang Nare, olilunga leZIPRA kanye le ZAPU, usole ukubunjwa kwekomishini exwayisa ukuthi isebenze kakhulu emaphandleni labantu abayibo abahlukuluzwa ngumbhuqazwe weGukurahundi.

UMnu. Kenneth Magwizi, obona ngokukhitshwa kwembiko kuZIPRA, uthi ikomishini le ifana lempisi exotsha imbuzi egangeni kuyiyo njalo ehleli esibayeni.

Lokhu kugcizelelwe nguMnu. Mxolisi Mhlanga, olilunga leMthwakazi Republic Party, othe ikhomishini yeNPRC iphuzile ukuqala ukuxoxisana lamabandla ezombusazwe.

Umgcinisihlalo we ZIPRA, uMnu. Ben Ncube, ubuze ikomishini le ukuthi ingabe ilamandla na okuthi ibize umongameli welizwe uMnu. Emmerson Mnangagwa ukuze abuzwe amacala akhe.

Umfundisi uRay Motsi, okhokhela iqembu leNational Transitional Justice Working Group oqoqe lumhlangano, uthe bahlanganise amabandla ezombusazwe ngenjongo yokuzama ukuthi baqale ukukhulumisana ukuze kube lokuthula ngesikhathi sokhetho kusiya phambili.

Umgcinisihlalo wekomishini le, uRetired Justice Selo Masole Nare, uthe umhlangano wangoLwesithathu uzasiza ukuthi kungabi lobudlwangudlwangu ngesikhathi sokhetho.

Amabandla ezombusazwe avumelane ukuthi ikhomishini yeNPRC ikhangelisise ukubandlululwa lokuncindezelwa kwabantu bemhlubulweni weMandebeleni osekubangele ukusweleka kwemisebenzi kanye lokufa kwamakhampani akoBulawayo kanye lokungabi lentuthuko ezabelweni zalesi sigaba.

Okunye njalo okuphume kumqoka emhlanganweni wamabandla la yikusweleka kwezincwadi zokuzalwa ngabantu beMatabeleland, ukubotshwa kwabakhokheli bamandla nxa besenza imihlangano, lokuthi impahla ezathathwa nguhulumende weZimbabwe zithathelwa amalunga eZIPRA zibiselwe.

INPRC ithi izaba lomhlangano omkhulu ozahlanganisa izabelo zonke zelizwe eHarare lapho okuzavunyelwana khona amanyathelo azathathwa yikomishini ukulungisisa inhlupho zokungezwani elizweni.

Udaba Esilethulelwe NguBathabile Masuku
please wait

No media source currently available

0:00 0:02:39 0:00

Facebook Forum

XS
SM
MD
LG