Umhlangano omkhulu wabamabhizimusi amancane laphakathi laphakathi owe Commercial Bank of Zimbabwe Small to Medium Enterprise Indaba ungene esukwini lwesibili ngoLwesine enkundleni yeZimbabwe International Trade Fair koBulawayo.
Umhlangano lo ungenwe ngosomabhizimusi abavele ezigabeni ezitshiyeyeneyo zeZimbabwe laphandle kwelizwe bexoxisana ngenhlupho abahlangana lazo lokuthi bengazithuthukisa njani.
Lumhlangano ubulesihloko esithi ‘Enhancing SME Growth Through Smart Partnerships’.
Umqoqi wenhlelo zeCBZ, uNkosikazi Johana Dube, uthi bajonge ukunikeza amabhizimusi amancane amathuba okuhlangana kanye lokuqinisa ukusebenzelana phakathi kwabo.
UNkosikazi Sikhangezokuhle Simali, olenkampani elungisa izicathulo njalo ubebukisa eyinye yempahla ayilungisayo, uthi lumbuthano umnikeza ithuba lokuhlangana labasowabo njalo izifundo eziqoqwe yiCBZ ziyabaphathisa kakhulu ekuthuthukiseni ibhizimusi.
Omunye njalo usomabhizimusi, uNkosikazi Celani Muungani, olilunga leKoparative yokufuya lokulima izivande eyePoultry Mushroom Rubbitry and Gardening, uncome umkhosi lo esithi ubaxhumanisa labanye abamabhizimusi lokuthi bathole amathuba okuthola imali ebhanga le CBZ.
Omunye njalo obetshengisa impahla yakhe evela enkampanini yeKusi Chemicals eseHarare, uNkosikazi Emilia Nyarongwe, uthi lumbuthano ubanikeze ithuba lokuhlanganela labamanye amankampani kanye lokuthola imfundiso yabebhanga leCBZ.
Ngaphandle kwemfundiso ebivela kwabebhanga leCBZ, abamabhizimusi amancane laphakathi laphakathi la bathole ithuba lokubukisa impahla abazilungisayo.
Umbuthano wemfundiso lo ungenwe ngabantu abangephezu kwamakhulu amane, inengi labo kungabesifazana abakumabhizimusi amancane laphakathi laphakathi kanye labammeli bamankampani amakhulu.
Ubugoqela njalo umabhalani wogatsha lwezokulungiswa lokuthengiselana, unkosikazi Abigail Shoniwa, uMeya wakoBulawayo, abebhanga le CBZ kanye labenhlanganiso ezizimeleyo.