Idale lephalamende yeMelika elaphansi, eleHouse of Representatives, selethule umthetho othi izisebenzi zalelidale kanye labavakatshi abazakwala ukugqoka ama-mask kumele babotshwa.
Lokhu kuza ngesikhathi umkhuhlane weCovid-19 usumemetheka ngamandla kulelilizwe.
Iphephandaba leThe Hill lithi umkhokheli wamapholisa asebenzela kulelidale uMnu Thomas Manger ulaye amapholisa ukuthi awulondoloze lumthetho lanxa usolwa ngabebandla eliphikisayo elamaRepublicans.
Basola ikakhulu usomlomo wedale uNkosikazi Nancy Pelosi owebandla lamaDemocrats besithi nguye ophume lomthetho lo.
AmaDemocrats asekela iziqondiso zokuvimba ukumemetheka kwe-coronavirus kodwa abanye abebandla lamaRepublicans abazisekeli lanxa nje abantu besifa ngobunengi.
Olwela amalungelo oluntu oyisizalwane seZimbabwe esihlala eMelika uMnu Garry Thwala Jackson utshele iStudio 7 ukuthi kavumelani lalumthetho.
