amalinks wokungena

Breaking News

Lidinga Inkezo yeCOSAFA Yesikhombisa Iqembu LamaWarriors


U-Xolisani Gwesela weZIFA

Iqembu labesilisa elimela ilizwe emdlalweni wenguqu elaziwa kakhulu ngegama elithi Zimbabwe Warriors liphakame NgoMvulo ekuseni lilubhekise kwele South Africa lapho eliyaphatheka khona kumncintiswano walonyaka owenkezo ye COSAFA.

Ekhuluma ngesikhathi iqembu lama Warriors lisanda kuphakama NgoMvulo ekuseni, isikhulumeli senhlanganiso ebona ngokuqhutshwa komdlalo wenguqu elizweni eye Zimbabwe Football Association, iZifa, uXolisani Gwesela, uthe balethemba ukuba iqembu lama Warriors lizaphenduka layo inkezo yeCOSAFA ekupheleni kwemidlalo yalonyaka.

“Inhlanganiso ye Zimbabwe Football Association ifuna ukwazisa uzulu ukuba abafana bethu bama Warriors sebesukumile besuka eHarare belubhekise ePort Elizabeth eSouth Africa, lapho okuzadlalwa khona umncintiswano walonyaka owenkezo yeCOSAFA.

Sibafisela inhlanhla abafana bakithi njalo silethemba elokuba bazadlala kuhle banqobe,” kutsho uGwesela.

Kusenjalo umqeqetshi weqembu lama Warriors uZdravko Logarusic kanye lomunye wabasekeli bakhe uLloyd Chitembwe kabayenelisanga ukungena elizweni le South Africa ndawonye leqembu lama Warriors.

UGwesela ukhuphe umbiko ilanga selisiya ngomtsha wendoda esithi uLogarusic ubengela ivisa emvumela ukuba angene kwele South Africa njalo bebengazange bemdingele ngemva kokucetshiswa yilabo ababaphathise ukuqoqa uhambo lweqembu lesizwe, itravel agent.

Uqhubekele phambili wathi uChitembwe yena ukuluhlu lwabantu abangasavunyelwa ukungena kulelolizwe njalo baphezu kwemizamo yokulungisa amaphepha ka Logarusic ukuze alandele.

Intathelizindaba yezemidlalo uNash Mkokwayarira usole kakhulu inhlanganiso ye Zifa ngalesisehlakalo.

“Okwenzakale kwele South Africa ukuba uLoga njengomqeqetshi omkhulu weqembu atholakale engela visa eyokungena eSouth Africa kutshengise ukungahleleki kwe Zifa ngenxa yokuthi yinto abayaziyo ukuba umuntu nxa ezahamba kumele abe lamaphepha afaneleyo.

UChitembwe laye ukuthi kavunyelwa eSouth Africa mhlawumbe vele yinto akade eyazi okuveza ukuthi ukuqoqeka kulutshwane,” kutsho uMkokwayarira.

Umqeqetshi weqembu le Dynamos uTonderai Ndiraya kanye lomqeqetshi wabonozinti uTembo Chuma bona bavunyelwe ukuba bangene kwele South Africa.

Umncintiswano walonyaka ukhangelelwe ukuqala kusasa ngoLwesibili mhla ziyisithupha kunyanga kaNtulikazi usiyafika emaphethelweni mhla zilitshumi lathoba minwe mbili kuyo njalo inyanga kaNtulikazi.

Ilizwe le Zimbabwe yilo eliphakamise kanengi inkezo ye COSAFA kumbali yalimidlalo njengoba selanqoba kumncintiswano eyisithupha kusukela lumncintiswano uqala ngomnyaka ka 1997.

Iqembu lama Warriors likusibaya sika Group C ndawonye le Mozambique, iNamibia kanye le Senegal. NgoLwesine lizadibana lele Mozambique emdlalweni walo wakuqala kuthi ele Namibia lizangqikilana lele Senegal.

Ezemidlalo siziphiwa nguJoseph Njanji
please wait

No media source currently available

0:00 0:02:15 0:00

Facebook Forum

XS
SM
MD
LG