amalinks wokungena

Breaking News

Lidonsa Nzima Iqembu LamaChevrons


Ukhaputeni weqembu elimela ilizwe emdlalweni kakhilikithi, uHamilton Masakadza

Liqhuba nzima iqembu elimela ilizwe emdlalweni kakhilikithi, elamaChevrons, kumkhankaso wokudinga amaqembu azakuyadlala kumncintiswano wezizwe zomhlaba ngomnyaka ka 2023.

Iqembu le Zimbabwe lihlezi emsileni wengalane yemiklomelo kumidlalo ye 2020 – 2023 ICC World Cup Super League ngemva kokuba selidlale imidlalo emihlanu, lanqotshwa kwemine, lanqoba kowodwa.

NgeSonto eyedluleyo iqembu le Zimbabwe linqotshwe ngele Bangladesh ngama wickets amathathu emdlalweni wesibili owohlobo lwe One Day International okutsho ukuba iqembu lezivakatshi yilo eselinqobe kumncintiswano we ODI njengoba linqobe lakumdlalo wakuqala ngama runs angu 155.

Amaqembu lawa azadibana ngoLwesibili emdlalweni wesithathu njalo ungowokucina owohlobo lwe One Day International lapho womabili lawa maqembu azabe elwisa ukunqoba ukuze athole imiklomelo elitshumi.

Ocubungula ezemidlalo uDumi Praise Dhlakama uthi yena indlela iqembu le Zimbabwe elidlale ngayo iyathembisa ukuba leliqembu lizathola imiklomelo kumidlalo elandelayo.

“Abanengi nje kuqembu bekungabafana abancane okokuthi kusiya phambili ikusasa yeqembu ikhanya inhle kuqembu lama Chevrons nxa sikhangela imidlalo yonaleyo esidlaliwe.

Isipiliyoni kodwa sona sisadingakala ikakhulu phezulu kubadlali abaqala ukutshaya ibhola. Abadlali abanjengo Sean Williams kanye lo Craig Ervine balokhu befunakala ngoba abafana abancane bayehluleka ukuba bengalahlekelwa ngama wickets kalula, okuyinto efaka alabo abadlali abalandela ngemva kwabo ebunzimeni,” kutsho uDhlakama.

Ophethe isikhundla sokuba ngukaputeni weqembu le Zimbabwe uBrendan Taylor uthi ngoLwesibili bazazama ukulungisisa amaphutha abawenze ngeSonto ukuze banqobe ele Bangladesh.

“Kubelengqubela phambili enkulu njalo ngijabule kakhulu ngendlela amajaha adlale ngayo. Kuyatholakala ukuthi nxa lizama ukuba lifikise ama overs angamatshumi amahlanu kube khona isikhathi lapho elingatholi khona ama runs njalo yikho okumele sikulungisise emdlalweni wakusasa,” kutsho uTaylor.

Kulamaqembu alitshumi lantathu ku 2020 – 2023 ICC World Cup Super League njalo amaqembu lawa kumele adlale lamanye ayithoba minwe mbili kumidlalo eyohlobo lwe One Day International.

Amaqembu azaphutsha esendaweni eziyithoba minwe mbili eziphezu kwengalane azahle athole ilungelo elokuyadlala kumncintiswano wezizwe zomhlaba ozaqoqwa lilizwe lase India.

Amaqembu azaphutsha esendaweni ezinhlanu ezingaphansi kwengalane ku Super League azaditshaniswa lalawo aqede esendaweni ezintathu phezu kwesibaya sika League 2 kanye lamabili azavela kuma play off azadlalwa ngamaqembu azakube esemsileni kuLeague 2 kanye lalawo aku Challenge League kudlalwe umncintiswano othiwa yi 2023 Cricket World Cup Qualifier ozaqhutshelwa kwele Zimbabwe.

Amaqembu amabili azaqeda ehlezi phezu kwengalane yemiklomelo yiwo azaphumelela ukuyadlala kumidlalo yezizwe zomhlaba.

Facebook Forum

XS
SM
MD
LG