Inani lasebebulewe ngumkhuhlane weCovid-19 eZimbabwe likhwelilwe izolo laya kumakhulu amabili alamatshumi amahlanu lantathu, 253, ngemva kokubhubha kwabantu kwababili.
Omunye wabantu laba ngowakoBulawayo kuthi omunye ngoweManicaland.
Ugatsha olubona ngezempilakahle luthi kulabangamatshumi njalo amathathu ababanjwe lumkhuhlane. Abalitshumi lanhlanu babo ngabakoBulawayo.
KulabeHarare abane, abeManicaland abane njalo, abeMasvingo abane, abeMashonaland East abane kanye lababili abeMatabeleland South. Abafunyanwe sebesilile balitshumi lanye.
Idolobho lakoBulawayo yilo elikhokhelayo kulezinsuku ngenani lababulawa yilumkhuhlane kanye lababanjwa belawo.
Abantu bafa phose nsuku zonke kulelidolobho nanku ngoLwesihlanu kufe oyedwa, ngoMgqibelo kwadlula omunye, kwazobhubha omunye njalo izolo.
Kusukela ngoMvulo odluleyo, sokufe abantu ayayisitshiyangalombili kulelidolobho.
Asebebanjwe umkhuhlane lo selokhu waqhamukayo eZimbabwe sebengu8531 kuthi asebesiline bangu8005.
Abalokhu begula bangu273 njalo iBulawayo yiyo elabanengi, abangu102 ilandelwa yiHarare elabangu62.
Asebebanjwe yilumkhuhlane emhlabeni jikelele bedlula izigidi ezingamatshumi amahlanu, 50,2 million njalo asebefile bedlula isigidi, 1,2 million, ngokutsho kweJohns Hopkins University.