Iqembu labesilisa elimela ilizwe emdlalweni wenguqu seliqalile ukuzilolonga lilungiselela ukuyaphatheka kumncintiswano owokudinga intshantshu zezwekazi labensundu owe Africa Cup of Nations.
Ekhuluma ngemva kosuku lwesibili olokuzilolonga, umqeqetshi weqembu lama Warriors uNorman Mapeza uthe konke kuhamba ngemfanelo enkambeni yabo.
“Konke kuhamba kuhle okwakhathesi njengoba lisazi siqale izolo ukuzilolonga. Bonke abadlali sebekhona ngaphandle kuka Teenage Hadebe yena osalungisa indaba zomndeni wangakibo.
Ngiyathokoza ngesengikubonile njalo ngifisa ukuba siqhubeke silokhu sisebenza silungiselela uhambo lwethu olokuya kwele Cameroon,” kutsho uMapeza.
Imvimbi uOnismor Bhasera ngomunye wabadlali asebake bayadlala kumncintiswano we Africa Cup of Nations njalo uthi isifiso sabo yikuba bedlule kusigaba sezibaya okuhlala kuphelela khona iqembu lelizwe le Zimbabwe.
“Sengike ngakufika njalo ngizasebenzisa ulwazi engilalo ukuthi ngiphathise abafana abangazake bafike khona.
Yebo kambe umdlalo wenguqu uhlezi untshintsha mihla ngemihla kodwa sikulinde ngamehlo abomvu ukuthi siyedlala njalo sikhangelele ukuba sifike kusigaba se sigumula, ese knockout. Yiyo injongo yethu okwamanje,” kutsho uBhasera.
Omunye wabadlali ozabe edlala okokuqala kumncintiswano we Africa Cup of Nations nxa engakhethwa ukuba abe yingxenye yabadlali abahambayo ngumgadli uPrince Dube, yena obekhalelwa ngabanengi kodwa engatholakali ngoba elimele.
“Ngizizwa ngifudumele ngaso sonke isikhathi lapho engibizwa khona ukuba ngizokuba yingxenye yeqembu lesizwe.
Kuyinto enkulu kakhulu kimi njalo engingakutsho yikuthi ngize lapha ukuthi ngizokwenza konke okusemandleni ami ukuthi ngincedise ilizwe lami ukuba liphumelele,” kutsho uDube.
UMapeza labasekeli bakhe baqambe abadlali abangamatshumi amathathu abathe kuzavela kubo labo abazahamba labo kwele Cameroon kodwa labo abadlala phetsheya kolwandle ababalisa ukaputeni weqembu uKnowledge Musona, uAlec Mudimu, uTino Kadewere, uDavid Moyo kanye lo Jordan Zemura bona bazahlangana labanye khonale kwele Cameroon.
Abanye abadlali beqembu lama Warriors abathenjiweyo ababalisa uMarvelous Nakamba kanye lo Marshal Munetsi bona abasoze baphumelele ukuyadlala kumncintiswano we Africa Cup of Nations ngoba belimele ikanti umgadli uKhama Billiat yena sewathatha umhlalaphansi ekudlaleleni iqembu lesizwe kuthi uTendayi Darikwa yena ucele ukungabi khona.
Iqembu le Zimbabwe likusibaya sika Group B ndawonye le Malawi, Senegal kanye le Guinea kodwa iqembu le Zimbabwe lilakho ukulaluka lingasadlalanga kulumncintiswano ngenxa yengxabano ekhona phakathi kwenhlanganiso ebona ngokuqhutshwa kwezemidlalo elizweni eye Sport and Recreation Commission kanye leye Zimbabwe Football Association.
Abe SRC bamise umsebenzi inkokheli ye Zifa njalo inhlanganiso ye Federation of International Football Association ithe ele Zimbabwe lizajeziswa kungaze kufike mhla zintathu kunyanga kaZibandlela ibhodi ye Zifa ingabiselwanga ezikhundleni.
