amalinks wokungena

Breaking News

Likha Phansi Iqembu leZimbabwe Kumdlalo weKhilikithi


Iqembu elimela iZimbabwe emdlalweni kaKhilikithi linqotshwe ngama wickets ayithoba munwe munye ngele Pakistan emdlalweni wesibili owohlobo lwe One Day International oqhutshelwe edolobheni lako Bulawayo

Iqembu le Zimbabwe yilo eliqale ukutshaya ibhola lathola ama runs alikhulu elilamatshumi ayithoba munwe munye lane (194), lilahlekelwe ngabadlali bonke phakathi kwe 49.2 overs.

Iqembu le Pakistan lithe seliphendula latshaya ama runs alikhulu elilamatshumi ayithoba munwe munye lanhlanu kuma overs angamatshumi amathathu lesithupha njalo linqobe kusasele amabhola angamatshumi ayithoba minwe mbili lane ukuba lifikise ama overs angamatshumi amahlanu.

Limpumela itsho ukuba iqembu le Zimbabwe selikhokhelwa nge 2 ka nya ngele Pakistan kusele imidlalo emithathu.

Umdlali weqembu le Zimbabwe uPeter Joseph Moor uthi kunengi okumele kulungisiswe ngabadlali beqembu e Zimbabwe ukuze lenelise ukuncintisana lele Pakistan kumidlalo emithathu eseleyo.

Nxa sifuna ukukhula njengabadlali kuzamele sifunde ukumelana lesimo esiyabe sesibhekane laso emdlalweni ikakhulu nxa sitshaya ibhola.

Akukho lula ukuba labadlali abatshaya ibhola abayisithupha ngoba labo abaqala ukutshaya ibhola bengaphanga bephume kuba lobunzima ngoba labo abalandelayo kuyabe sekumele kube yibo abaphathisa iqembu yikho ke kuqakathekile ukuba labo abaqala ukutshaya ibhola behlale isikhathi eside bengakaphumi.

Emdlalweni wakuqala odlalwe ngoLwesihlanu olwedluleyo iqembu le Zimbabwe linqotshwe ngama runs angamatshumi ayisikhombisa lane.

Umdlalo olandelayo njalo ungowesithathu phakathi kwalawa maqembu ukhona ngoLwesithathu mhla zilitshumi lathoba minwe mbili njalo kumele iqembu le Zimbabwe linqobe kulumdlalo ukuze liyale lilokhu lilamathuba okunqoba kulumncintiswano ngoba nxa ele Pakistan linganqoba kuyabe sekusitsho ukuba selihle lanqoba ngoba kuyabe sekuyi 3 ka nya kusele imidlalo emibili.

Umdlalo wesine uzakuba khona ngoLwesihlanu mhla zingamatshumi amabili kunyanga kaNtulikazi kuthi owesihlanu njalo ungowokucina uzakuba khona ngeSonto mhla zingamatshumi amabili lambili.

Yonke limidlalo izadlalelwa enkundleni ye Queens Sports Club esedolobheni lako Bulawayo.

please wait

No media source currently available

0:00 0:02:07 0:00
XS
SM
MD
LG