amalinks wokungena

Breaking News

Liphuma Lendaba: Sixoxa loMnu. Lovemore Moyo Owasuka KuMDC-T Wasungula Ibandla leUnited Movement for Devolution


UMnu. Lovemore Moyo

Namhla kuhlelo lwethu Liphuma Lendaba Litshone Lendaba esilethulela lona maviki wonke ngoMgibelo sixoxe loMnu. Lovemore Moyo, owayengusomlomo wedale lephalande osekhokhela ibandla elitsha elithiwa United Movement for Devolution.

UMoyo uthi lelibandla lafaka abazancintisa kukhetho lokudinga amalunga edale lephalamende abalitshumi lasifica minwe mibili labazadinga ukuncintisa kukhetho lwamakhansila abalitshumi lanhlanu kodwa hatshi umongameli welizwe.

"Injongo yethu njengebandla ngeyokuthi sithuthukise izigaba lezigaba ngokutshiyana kwazo sisebenzisa isisekelo sombuso welizwe uChapter 14 uvumela ukwehliswa kwamandla esiya ezabelweni," kutsho uMoyo.

Uthi okwakuqala kuzakuba yikwehlisa amandla evela kuhulumende wesizwe, icentral government esuka eHarare ukuze abantu benelise ukuzinakekela befaka inhlelo zentuthuko.

UMoyo uthi okwesibili kumele abantu babe yibo abenelisa ukufaka imithetho ezabakhangela ngeziqinti ngendlela abafuna ukuhlala ngayo njengalokho okulotshwe kusisekelo sombuso.

"Njengenhlanganiso yikho esikukhangeleyo ukuthi inhlanganiso isebenze kanzima ukuze iconstitution yenze ukuthi amandla ehliswe ezabelweni ngokutshiyana kwazo," kutsho uMoyo.

Uthi okunye abakukhangeleyo njengebandla yikuncindezelwa kweminye imihlobo "yilowo omnengi" kulonaleli ilizwe.

Uthi njengenhlanganiso abafuni uncindezelo kungakhathalekile ukuthi kusezifundweni, emakhaya, emsebenzini kumbe kwezentuthuko.

UMoyo uthi ibandla labo likhona elizweni jikelele kodwa wengezelela esithi: "Kufana lokuthi umlilo ungawulumathisa uqala ngalapho oyabe uwubase khona kodwa ubusuqhela indawana yonke."

Uphe umzekeliso wamadayimana awatholakala koMarange esigabeni seManicaland kodwa kwaba ngabavela kwezinye izigaba abathola inzuzo.

please wait

No media source currently available

0:00 0:07:21 0:00

Facebook Forum

XS
SM
MD
LG