amalinks wokungena

Breaking News

Lisaselalo Ithuba Lokuphumelela Iqembu leZimbabwe Warriors


Lizwe Sweswe
Lizwe Sweswe

Abaqeqetshi bomdlalo wenguqu bathi lisasekhona ithuba elokuba iqembu lama Warriors lidlulele kusigaba esilandelayo esomncintiswano weAfrican Nations Championship loba nje linqotshwe ngeleCameroon emdlalweni walo wakuqala owesibaya sika Group A.

Umqeqetshi weqembu le Trukumb uLizwe Sweswe uthi umdlalo wakuqala ubuvele unzima kuqembu le Zimbabwe njengoba belidlala leqembu elimela ilizwe okuyilo eliqoqe lumncintiswano we Chan.

“Khona ukuba besidlala labaqoqi bomncintiswano kanye lokuthi kwelakithi lapha sesilomnyaka singadlali ibhola kwenza ngithi abafana badlale kuhle kakhulu.

Umdlalo wakuqala ube ngowokuthi babone amaphutha lalapho abangalungisisa khona. Sekuzakuthi lapho esizadlala khona lamanye amaqembu sizame sibone ukuthi singadlulela phambili njani. Lumdlalo osudlulile awube yisifundo esizakwenza sidlulele phambili njengokubona kwami,” kutsho uSweswe.

Umsekeli kamqeqetshi weqembu lamankazana asakhulayo amela ilizwe le Zimbabwe emdlalweni wenguqu uBoga Ndebele uthi yena amaqembu phose wonke aphatheka kumncintiswano weChan asesimeni esifanayo ngenxa yomkhuhlane we Covid – 19 ophazamise amalungiselelo.

“Iqembu lelizwe lilawo amathuba okuphumelela ngoba nxa ngikhangela wonke amaqembu akumncintiswano lo awalungiselelanga kuhle.

Sokungumdlalo odinga ubungqwele babaqeqetshi ukuba nguphi ngempela ozakhuluma labafana bakhe bedlale bethole impumela efaneleyo,” kutsho uNdebele.

Iqembu le Zimbabwe lisemsileni wengalane yesibaya sika Group A ngemva kokunqotshwa nge 1 ka nya liqembu le Cameroon lona elihlezi esiqongweni lilemiklomelo emithathu.

Emdlalweni walo olandelayo iqembu le Zimbabwe lizadlala lele Burkina Faso lona elisesimeni esifana lese Zimbabwe njengoba linqotshwe nge 1 ka nya ngele Mali emdlalweni walo wakuqala.

Iqembu le Cameroon lona lizadibana lele Mali komunye umdlalo wesibaya sika Group A ngoLwesithathu ntambama.

XS
SM
MD
LG