Amalunga edale lephalamende awebandla eliphikisayo le MDC-T elikhokhelwa nguMnu. Nelson Chamisa athi azasebenzi gadalala ukwenzela ukuthi aguqule impilo kazulu loba esazi ukuthi ayingcosana edale leli.
Kuthi-ke amalunga edale leli akubandla leZanu PF athi azazama kakhulu ukukhathalela abantu sonke isikhathi ngokwenza imithetho elengqondo njalo lokuthi kubelomnotho ovuselela umnotho kazulu.
UNkosazana Thabitha Khumalo, omunye wabangene edale lephalamende ngendlela yeProportional Representation ngaphansi komanyano weMDC Alliance, uthi ukuba balutshwana kwabo akusoze kubenze behluleke ukuqhuba umsebenzi wabo.
UMaKhumalo uthi umsebenzi wabo njengamalunga edale lephalamende yikumela uzulu kungakhathelekile ukuba ungowaliphi ibandla.
UMnu. Fortunate Chasi, owebandla le Zanu PF, uthi ibandla lakhe lizalwela uzulu ngokwenza imithathe esekela ukuthuthuka komnotho welizwe.
UMnu. Tjenesani Ntungakwa, ingcwethi kwezombusazwe, uthi akulalutho oluzakwenziwa ngumanyano weMDC Alliance ngoba malutshwana amalunga ebandla leli edale lephalamende.
Uthi amalunga edale leZanu PF alakho ukwenza santando njengoba bebanengi.
Uthi okunye okuhluphayo yikuthi amanye amalunga edale lephalamende kawawuzwisisi umsebenzi wabo.
