Ukhetho lwama primaries ebandla leMDC-T elikhokhelwa nguMnu. Nelson Chamisa, lokudinga ozamela iKuwadzana East edale lephalamende lumisiwe lamuhla kulandela ukuphikisana okumangalisayo phakathi kwabamele abafisa ukuncintisa kukhetho lwelizwe oluzayo.
Abalandeli baka Mnu. Chalton Hwende loMnu. Shakespear Mukoyi bajamelene lwaze lwamiswa ukhetho eKuwadzana East. UHwende ovela phandle kwendawo le ubikwa esetshelwe ukuthi abuyele eMashonaland West lapho azancintisa khona kukhetho lweSenate.
Kasenelisanga ukukhuluma lababili laba njalo lesikhulumeli sebandla leMDC leli, uNkosazana Thabitha Khumalo.
Kodwa ilunga lebandla leMDC-T, uMnu. Prince Dubeko Sibanda, utshele iStudio 7 ukuthi luzalungiswa ngemfamelo udaba lwama primary elections ahluphayo.
Uthi ukuxabana kwabantu laba kubandla leMDC-T kungenza ukuthi bengaqhubi kahle ukhetho lonyaka.
Amanye amalunga ebandla leMDC-T athi kawasasuthiseki ngendlala ibandla labo elehluleka ukuqhuba ngayo uhlelo lwama primaries esithi lokhu kungaqhubekela phambili ibandla labo linganqotshwa kukhetho oluzayo.
UMnu. Sifiso Ncube, omunye walabo esikhulume laye eseMorgan Tsvangirai House eHarare, lapho abemelele khona impumelo yokhetho lwama primaries endaweni ezinjenge Hatfield, Glen View North leEpworth, uthi aluqhutshwa ngemfanelo ukhetho lolu.
“Mina ngibona angani kasiyo ndlela okumele ukhetho luqhutshwe ngayo. Nxa sithatha isikhathi eside kangaka ukukhetha abazasimela sikhipha eminye imithetho yethu kambe kutshoni ngamalungiselelo ethu, mhlawumbe uMongamele Chamisa sokumele angenele.
Lokhu kusekelwe nguMnu. Leon Sithole yingcwethi kwezombusazwe.
“Ukulandlela engenza ibandla eliphikisao linqabe nxa lisehluleka ukukhetha abantu abazalimela. Nxa sikukhengelisisa lokhu okwenzakalayo kuzenza Izanu PF izithaphuzele ngoba phela amalunga abo amanengi ayabe engathabanga.”
Ilunga lebandla leli, uMnu. Peter Manala, uthe kuyadanisa okwenziwa libandla leMDC-T elikhokhelwa nguChamisa.
“Mina ngiswele amagama engingawatsho ngendlela ibandla lethu elihluleka ngayo ikuqoqa ukhetho lwabammeli bephalamende. Kungenza ngibuze umbuzo wokuthi kambe ibandla lethu lilindele na ukungena embusweni nxa sisehluleka ukukhethana sodwa.”
Omunye wakhe, uNyasha Madziva, uthi kuyenzakala ukuthi abanye abalandeli bebandla leli bengacina bevotela amanye amabandla kumbe abantu abazimele bodwa kukhetho oluzayo.
“Ngokubona kwami sesingaba lokubazwisisani kundlelo yokukhetha abammeli bepahalamende ngoba abantu sebengatshaya ibhora musango okutsho ukuthi bangavotela labo abazimele bodwa.”
Kusenjalo, amalunga ebebandla leli eMagwegwe koBulawayo athi afuna kwenziwe ukhetho lwama primaries ngemfanelo. UMnu. Mzingaye Ncube, umsekeli kanobhala eMagwegwe, uthi ukhetho lolu kaluqhutshwa kahle.
Akwaziwa okuzakwenzakala kunsukwana ezilandelayo ngokhetho lwama primaries lwebandla leMDC-T elikhokhelwa nguChamisa.