amalinks wokungena

Breaking News

Abantu Baqhubekela Phambili Besebenzisa Idola leMelika eZimbabwe


Osomabhizimusi lezakhamizi zakoBulawayo ngoLwesibili baqhubekele phambili besebenzisa imali yakwamanye amazwe kungakhathalekile ukwethulwa komthetho ophawulwe nguhulumende oweStatutory Instrument 142, 2019, owalisa ukusetshenziswa kwemali yakwamanye amazwe elizweni kusukela ngoMvulo okulinyathelo elisolwa ngabanengi.

Isakhamuzi sakoBulawayo, uMnu Mandla Tshuma, uthi akumangalisi ukuthi uzulu lokhe esebenzisa limali ngoba yiyo alayo eyakuleli ayitholakali emabhanga.

"Okwenzakala phandle kuzwisa ubuhlungu njalo ngisola uhulumende ngokuvuka emisa uzulu ukusebenzisa imali yakwamanye amazwe njalo angibasoli labo abalokhe besebenzisa limali ngoba lemakhaya bavele abayisebenzisi eyakuleli bekungabakuhle uma uhulumende ebengalungisa imali yakuleli avumele abantu beqhubeke besebenzisa imali yakwamanye amazwe,''

Osakhulayo wakoBulawayo, uBakidzanani Dube, uthi ukuqhubeka kokusebenza kwemali yakwamanye amazwe koBulawayo kumele kwenzakale ngoba abantu abala eyinye indlela yokuphila.

“Ukusebenza kwemali yakwamanye amazwe kumele kuqhubekele phambili ngoba uhulumende uvuke ebabambe amehlo njalo kumele kwenzakale bazaqhubeka bezithiba ukuyisebenzisa kodwa kunjalo.''

Esinye njalo isakhamuzi sako Bulawayo, uMnu. Steven Mbizo, uthi idola leMelika lingumgogodla wenotho yamazwe womhlaba ngakho-ke ukuthi uhulumende athi lingasebenzi yikudlalisa isikhathi.

“Imali yakwamanye amazwe ikakhulu idola leMelika lingumgodla wamazwe onke, bakwenza eVenezuela kodwa bayaphuma abakhona besiyadinga idola leMelika. Njalo leyomali silakho ukuyisebenzisa kwamanye amazwe, lokhu kufana lokutshaya indlovu ngempama. Sizaqhubeka siyisebenzisa eyethu liphepha ngeke uyelalo kwele Bostwana kumbe eSouth Africa isebenza khonapha okwethu liphepha oneke ulisebenzise kwamanye amazwe. "

Kodwa uNKosikazi Lucky Fengu, ohlala emzini weMatshobana, uthi kuhle ukuthi uhulumende alise ukusetshenziswa kwemali yakwamanye amazwe.

“Ukusebenza kwemali yakwamanye amazwe kusithwalisa nzima lapho esisebenza khona asiholi mali yakwamanye amazwe, sesisifa sihleli ezindlini imithi lemavinkilini amanye kusebenza idola leMelika abasafuni ibond note lakuleli sesithwele nzima."

Kodwa uMnu. Vusa Chirwa uthi okwenziwe nguhulumende akukho emthwethweni.

“Okwenziwe nguhulumende akukho emthethweni njalo ibond note yenziwa ukuba ibhaxiswe lebond note, ukukhupha idola lemelika akukho emthethweni njalo ibond note yathi isenziwa kwathiwa izobhaxisa idola lemelika.”

Imali yomhlobo lwebond note iyalingana lemali yebulenjini iRTGS njalo kusukela izolo akulamuntu olelungelo lokusebenzisa imali yakwamanye amazwe ethenga kumbe ethengisa eZimbabwe.

KoBulawayo osomabhizimusi lozulu ngoLwesibili baqhubekele phambili besebenzisa imali abalayo yakwamanye amazwe.

Udaba Esilethulelwe NguAnnastacia Ndlovu
please wait

No media source currently available

0:00 0:05:29 0:00

XS
SM
MD
LG