Umhlangano osaqhubeka owokukhetha umholi wedale lephalamende yamazwe akuzwekazi leAfrica eyePan African Parliament izolo umisiwe ngenxa yengxabangxoza elokhe iqhubeka kulelidale, ngesikhathi abavela emazweni angeZansi yeAfrica besithi kufanele kuphiwane amazopho kodwa abanye bekuphikisa lokhu.
Kuphoselwane aqatha ngemva kokuba ilunga lekhomithi ebona ngezokhetho kulelidale uNkosikazi Barbara Rwodzi, oweZimbabwe egcizelele njengakwenze ngoMvulo ukuthi ngempela kufanele kuntshintshwane lesi isikhundla.
Amazwi akhe agcizelelwe ngumkhokheli webandla leEconomic Freedom Fighters uMnu. Julius Malema labanye abaxokozeleyo umabhalane waliphalamende waze wamisa lumhlangano esithi kumele abantu beqale bejikame ngoba akulakhetho olungaqhutshwa kuhle ngendlela abanye abathukuthele ngayo.
Kubonakale owesilisa ezama ukukhahlasela owesifana, kulokufuqana, ukwethukana, njalo abanye bebedonselana ibhokisi lokuvotela.
Ingcwethi kwezombusazwe uMnu. Zenzo Nkomo utshele iStudio 7 ukuthi ukudonselana lokhu kuveza ukuthi akulakubambana phakathi kwamazwe aseAfrica.
