Udubo lwababalisi abangenelisi ukukhuluma indimi zeMatabeleland kodwa abafundisa ezikolo zalesi sigaba luya phambili uhulumende esithi uphakathi kokudingisisa ngokuxotshwa kwababalisi abahlanu abakhuluma ulimi lwesiShona eNkankezi Primary School.
Obona ngokwethulwa kwembiko kugatsha lwezemfundo yaphansi uMnu Taungana Ndoro utshele iphephandaba leChronicle ukuthi iziphathamandla ezihlolisisa ngezemfundo esigabeni seInsiza ziphakathi kokuphenya loludaba njalo zizakwazisa uhulumende impumela.
Abazali babikwa beyibo abathe ababalisi laba baxotshwe. Nyakenye, uNkosikazi Sithembiso Nyoni, omela iNkayi North edale lephalamende njalo eyisiphathamandla seZanu PF watshela iStudio 7 ukuthi wangenela kudaba olufanayo kulindawo ngoba umphathisikolo lababalisi abayisitshiyangalombili bonke babevela esigabeni seMasvingo njalo bengenelisi ukukhuluma isiNdebele.
Kodwa wathi akufanelanga bexotshwe kungelasisombululo ngaloludaba.
Ingcwethi kwezemfundo uMnu Thandeko Zinti Mnkandla utshele iStudio 7 ukuthi uhlupho lolu alutholakali ezikolo kuphela.