amalinks wokungena

Luqhubekela Phambili Uhlelo Lokubhalisa Uzulu Kugwalo Lokuvota


Ugatsha lwezokhetho, olwe Zimbabwe Electoral Commission (ZEC) seluqalile ukubhalisa abantu abakade bengavunyelwa ukuvota ngenxa yokuthi balabazali abavela kwamanye amazwe, okuthiwa ngama aliens ngeSilungu kuhlandla lokucina lohlelo lokubhalisa kutsha kwamangama abavoti oluqale ngoMvulo njalo oluzaphela kumaviki amabili alandelayo.

Ekhuluma leStudio 7 isiphathamandla seZEC, uDistrict Elections Officer koBulawayo, uNkosikazi Sithokozile Khuphe, uthe kuhlandla leli lalonyaka abantu ababengavunyelwa ukuvota sebeqalile ukuzobhalisa amagama abo kuluhlu lwabavoti.

Uthe abanye babiselwa emuva kuviki ephelileyo ngoba iZEC ibingakatholi umbiko obavumela ukubabhalisa kulandela isinqumo esabekwa yinkantolo.

UNkosikazi Maria Phiri uthE kuzwisa ubuhlungu ukuthi uhulumende ubengabavumeli ukuvota isikhathi sonke lesi njalo lesi sinqumo sizakwenza labo bazizwe bengabantu abaphatheka enhlelweni zesizwe beyingxenye yelizwe.

Osebenza lenhlanganiso ezizimeleyo, uMnu. David Ndlovu, uthe inyathelo lokubhalisa abantu ababebizwa ngokuthi ngama aliens lihle kakhulu.

Ugcizelele esithi kumele iZEC yengezelele insuku zokubhalisa ukuvota ukuze inani labantu abazavota likhwele.

IStudio 7 izame ukuphenya ukuthi uhlelo lokubhalisa abantu luzangezelelwa insuku na njengoba inani labantu eselibhalisile kumahlandla amathathu adluleyo lingaphansi kwengxenye yabantu abakhangelelwe ukubhalisa.

Kodwa ihofisi yakoBulawayo eyeZEC ayilayo impendulo. Ithi umbuzo lo kumele uqondiswe kuziphathamandla zeZEC eziseHarare. Kodwa lazo zehluleke ukuwuphendula.

Umbiko okhitshwe yiZEC uveza ukuba sokubhaliswe abantu abayizigidi ezintathu lenkulungwane ezingamakhulu amathathu (3,382,040) khona bekukhangelelwe ukuthi kusiyaphutsha loluhlelo sekubhalise abantu abayzigidi eziyisikhombisa, (7 million).

Facebook Forum

XS
SM
MD
LG