amalinks wokungena

Breaking News

Luyaphumelela Uhlelo Lokusenga Inkomo


UNkosazana Prayers Mhlophe omunye wabafuya inkomo eIrisvale.

Izakhamizi zeIrisvale esabelweni seMatabeleland South zithi luyaphumelela uhlelo lwazo lokufuya inkomo zochago oluphathiswa yinhlanganiso yeFeed the Future.

Uhlelo lolu luyaphumelela ngoba abalimi sebesenelisa ukuthengisela uchago eUmzingwane Milk Collection Centre.

Inhlanganiso eyasungula loluhlelo iFeed The Future ithi ihlose ukufundisa izakhamuzi ukuba benelise ukuba ngabalimi bochago besebenzisa inkomo zenyama njalo bangezelele elizweni ekutholeni uchago.

UMnu. Meinade Chirima, okhokhela inhlanganiso ye Feed The Future, uthi bapha abalimi ulwazi lokufuya inkomo zochago besebenzisa inkomo zenyama, kuthi ngokuya kwezikhathi babe ngabalimi bochago ngokugcweleyo.

“Abalimi bayafundiswa ukusenga uchago kodwa besebenzisa inkomo zenyama. Lokhu kuyancedisa ukuthi inkomo yenze kuhle njalo uhlelo lolu lupha labalimi ulwazi lokuba ngabalimisi bochago ngenkomo abalazo. Sibona engani abalimi baluthathela phezulu lolu hlelo kuthi ngokuya kwesikhathi bazabe sebengabalimisi abakhulu bochago asebengezelela kabanzi elizweni ekutholeni uchago.”

UNkosikazi Soneni Ncube, ongomunye wabalimi abasenga inkomo, uthi sesenelisa ukufundisa imuli yakhe ngoba sethola imali ekusengeni inkomo.

Indawo yokusengela inkomo ...
Indawo yokusengela inkomo ...

“Mina ngiyabonga kakhulu kwabe Feed The Future ngoba yibo abasifundisa ukuthi inkomo zenyama ziyavuma ukuba zibe ngezochago. Lamuhla sesingabasengi abakhulu abathengisa uchago ngenxa yalimfundiso. Imuli zethu azisalwazi udubo ngoba siyathola imali zethu every 2weeks, thina indlala asisayazi.”

Omunye wabalimi bochago, uNkosikazi Nokuthula Moyo, uthi ukuba ukufuya inkomo zochago ayisiwo msebenzi kababa kuphela.

“Ukuba ngumlimisi wochago ayisiwo msebenzi kababa, umuntu ongumama wenelisa ukugcina inkomo, mhlawumbe eze enze ngcono kulobaba. Thina sikhonalapha singabomama kodwa sesithola imali yethu ekubeni ngabalimisi bochago. Asisabuyeli emuva ngoba sesikwazi ukuthi inkomo iyakungcina, njalo ngikhuthaza omama ukuthi asekeleni ukuthi sihlale sikhangelele kubobaba, lathi siyenelisa ukuphilisa imuli zethu nxa singaba ngabasengi bochago.”

Omunye wabalimisi uNkosazana Beauty Dube uthi bayaphakama kuhlelo lolu.

“Mina ngathi ngiqalisa ngangisenga i-1 litre ngelanga, ngathi lami mana ngizame. Ngikhuluma lamuhlanje sengisenga 7 litres kunkomo eyodwa, khathesi ngileziyi four. Isifiso sethu yikuthi uchago lwethu lungapheleli eUmzigwane Milk Collection Centre kodwa lathi sithengisele iDairy Board yeZimbabwe sibe ngabalimisi abakhulu. Sibona lokhu kuzafezeka ngoba nanku sesathenga i-solar, langaze amagetsi ahambe, uchago lwethu luhlala lufresh. Umahluko omkhulu sukhona empilweni zethu, siyabonga kwabeFeed The Future.”

Abalimi laba bathi inkomo ingaba lethole, sebeyivalela ingasayi emadlelweni lezinye, bayiphe ukudla okwenza ukuthi yehlise ngamandla ukuze benelise ukuthi bayisenge.

Bathi bakhangelele ukuba ngokuhamba kwesikhathi banelise ukuthenga ezochago inkomo ukuze benelise ukuthengisela iZimbabwe yonke.

Inhlanganiso yeFeed the Future, eyiyo eyasungula loluhlelo, ithi iyajabula ngoba izakhamuzi zayamukela kuhle uhlelo lolu njalo kulezithelo ezibukekayo empilweni zabo.

Bathakazelela Uhlelo Lokusenga Inkomo
please wait

No media source currently available

0:00 0:04:09 0:00

Facebook Forum

XS
SM
MD
LG