amalinks wokungena

Breaking News

Luyaqhubeka Udlame kweleSouth Africa Lapho Osokufe Abantu Abangu-45


A police officer detains a suspect during a protest, as violence following the jailing of former South African President Jacob Zuma spread to the country's main economic hub in Johannesburg, South Africa, July 11, 2021. REUTERS/Sumaya Hisham

Amapholisa akweleSouth Africa athi sokufe abantu abangamatshumi amane lanhlanu, 45, ngenxa yodlakela oluqalwe ngabasekeli bakaMnu Jacob Zuma ngeviki edluleyo besithi bafuna akhululwe.

Lanxa uMongameli Cyril Ramaphosa exwayise abantu ukuthi batshiyane lodlame lolu ngoMvulo, ubudlova lobu bebuqhubeka ngoLwesibili abantu belokhe bentshontsha impahla ezitolo eDurburn laweGauteng.

Umphathintambo obona ngokusebenza kwamapholisa uMnu Bheki Cele utshele umsakazo we-eNCA ukuthi inani lasebebotshiwe phezu kobudlwangudlwangu lobu selikhwele laya kunkulungwane ezedlula eziyisikhombisa, 750.

Amapholisa aveze njalo ukuthi esabelweni seGauteng sokufe abantu abangamatshumi phose amabili, 19, njalo nxa behlangana lasebebhubhile kwaZulu Natal sebengamatshumi amane lanhlanu, 45.

Amapholisa athi athole izidumbu zabantu abalitshumi ngoLwesibili kwenye indawo elezitolo ezinengi ezigqekezwe ngoMvulo elokitshini leSoweto.

Kucatshangelwa ukuthi abantu laba banyathelwe lixuku labantu abebephithizela bebangisana impahla ngemva kokungena kulezi zitolo ngodlakela.

Emazwini awethule izolo ntambama uMongameli Cyril Ramaphosa uxwayise abantu ukuthi batshiyane lodlakela lolu kodwa ngezehlakalo zanamuhla, sokusobala ukuthi ubekhuza amahlongandlebe.

Omunye wabasekeli bakaZuma ongathandanga ukubethwa ngegama utshele iStudio 7 ukuthi ukuphuma kukaMsholozi ejele yikho kuphela okuzaqeda loludlakela.

“Ngitshengisa ukucasuka lokuthukuthela ngoba uma ngikhuluma lami akekho ongilalelayo ukuthi uZuma akaphume ejele. Singumphakathi wala ehostela sisazoqhubeka sisilwa uZuma aze aphume entolongweni,” kutsho lumlisa.

“Sithi akaphume entolongweni silambile. Nguyena umuntu owayesisiza ngemali uRamaphosa usiphe imali waphinde wasiphuca. Kwakungcono kusasenguZuma ngoba imali wayeyifaka. URamaphosa upha abantu bangakubo imali asimfuni.”

Isizalwane seZimbabwe uMnu Greatman Mkhwebu yena uthe uhlupho olubhekane leSouth Africa yikuthi kudala leli lizwe lisekela izizalwane zalo zisenza umkhuba ofanayo kuzizalwane zakwamanye amazwe.

“Lento ibiqala isenzakala kumaforeigners bekungekho umuntu oyisukumelayo, kungathi abanye kuyabajabulisa this and that. Umkhonto sowugwaze ekhaya yikhona beqala ukubona ukuthi kanti into le inje,” kutsho uMkhwebu.

Uqhubeke wathi: “Socina sidlana thina sodwa singabantu ngoba indlala izongena izitolo kuzacina zingasela kudla. So ubugebengu uzacina ungenelwa ngabantu befuna ukudla sisazobulalana thina sodwa abantu abamnyama.”

Umkhokheli webandla leMthwakazi Republic Party uMnu Mqondisi Moyo uxwayise izizalwaze zeZimbabwe ukuthi zingaze zaphatheka kuloludlakela.

Kusenjalo umthethwandaba weConstitutional Court ngoMvulo uhluze isicelo sikaZuma sokuthi ubeke eceleni isigwebo sakhe sokupika okomnyaka olenyanga ezintathi njalo akhululwe.

Umthethwandaba uthi uzakwethula isigwebo esikhathini esilandelayo.

please wait

No media source currently available

0:00 0:03:40 0:00

Facebook Forum

XS
SM
MD
LG