amalinks wokungena

Breaking News

Madinda Ndlovu: Ukuhlangana Labalandeli Beqembu leBosso Kulola Abafana Bethu ...


Highlanders Football Club

Umqeqetshi weqembu le Highlanders uMadinda Ndlovu uthi uhlelo lokuhlangana labalandeli beqembu luzakupha abafana bakhe amadlabuzane mhla bedibana leqembu le Dynamos ekuqaleni kwenyanga ezayo.

Iqembu le Highlanders liqale uhlelo olokuxoxisana labandeli balo ezitaladeni zedolobho lako Bulawayo ngoLwesithathu olwedluleyo njalo ngoMgqibelo leliqembu lizasebenzisa ithuba elokudluliselwa phambili kwemidlalo ye Castle Lager Premier Soccer League ukuthi abadlali balo betshone emahofisini enkampani eyezokukhulumisana esekela leliqembu ngemali bekwejise labalandeli bomdlalo wenguqu.

Ekhuluma lentathelizindaba zemidlalo phezu kwaloludaba umqeqetshi weqembu le Highlanders, uMadinda Ndlovu, uthe ukuhlangana kwabo labalandeli kulakho ukupha abafana bakhe amadlabuzane awokunqoba iqembu le Dynamos lona okumele badlale lala emdlalweni wabo olandelayo mhla zinhlanu kunyanga kaNcwabakazi.

UNdlovu uthe yena lokhu kungoba abafana bakhe bazaxoxisana labalandeli abatshiyeneyo abomdlalo wenguqu okugoqela ngitsho labeqembu le Dynamos njalo ukuhozwa abazakwenziwa kuzabenza bahle bezimisele ukudlala beqinile.

Imidlalo yesigaba se Castle Lager Premier Soccer League obukumele idlalwe kulimpelaviki idluliselwe phambili ngoba ilizwe lilungiselela ukhetho likaMongameli omutsha kanye labameli bephalamende oluzaqhutshwa ngoMvulo mhla zingamatshumi amathathu kunyanga kaNtulikazi.

Sikhangele umdlalo kakhilikithi: Abalandeli bomdlalo kakhilikithi edolobheni lako Bulawayo sebekhuthazwe ukuba babuye ngobunengi babo ukuz0bukela umncintiswano we Spar Bonsa Twenty 20 ozaqhutshelwa enkundleni yeOld Mutual Heath Streak Academy ngeSonto.

Owayengukaputeni waphinda njalo waba ngumqeqetshi weqembu lesizwe uHeath Streak uthi lumncintiswano upha uzulu othanda umdlalo kakhilikithi ithuba elokubona abadlali bezinga laphezulu baphinde njalo babone abadlali bakusasa kulumncintiswano.

“Akubhadalwa abantu balakho ukuzozibukelela santando njalo kunengi okuzabe kusenziwa okokuthi kuzakuba mnandi kakhulu. Abantu ababuye bezozibonela abafana bako Bulawayo bedlala bezibonele ukuba uBulawayo ulabadlali abanjani njalo kungangithokozisa kakhulu nxa abantu bengeza ngobunengi ukuzosekela lababadlali.”

Umncintiswano we Spar Bonsa Twenty 20 League usukuviki yesine njalo ungenwe ngabadlali abangamatshumi ayithoba munwe munye abakumaqembu ayisithupha abunjwa ngabadlali abalitshumi lanhlanu iqembu ngalinye.

Amaqembu lawa ngabalisa ele Badgers, ele Raptors, ele Blazers, ele Tigers, ele Hawks kanye lele Sabres.

Facebook Forum

XS
SM
MD
LG