amalinks wokungena

Breaking News

'Sifuna Ukulolonga Abafana Bethu Babeyimbabazani Hatshi Ukuthatha Isicoco sePSL Lonyaka'


FILE: Usala ematasatasa unozinti weNgezi Platimum ohlohlwe ngumgadli weBosso.

Umqeqetshi weqembu leHighlanders uMadinda Ndlovu uthi iqembu lakhe kalizihluphi ngokuncintisana leqembu elihlezi phezu kwengalane ele Ngezi Platinum ngoba lingela njongo eyokuphakamisa isicoco lonyaka.

Ekhuluma lentatheli zindaba zemidlalo ngoLwesine, uNdlovu uthe yena kuyamangalisa ukuba kukhona abantu asebekhuluma angathi umlandu wakhe lonyaka ngowokuphakamisa isicoco ikanti wona ngowokulandela izinqumo ezathathwa yimuli yeqembu le Highlanders eyokuba leliqembu lidlalise abafana abancane abakhulele kulo ukuze kuvuselelwe isiko leqembu.

UNdlovu utsho lokhu ngoba kukhona asebesola ukudlala kweqembu lakhe asebefuna lihle lincintise ukuphakamisa isicoco lonyaka kodwa yena uthi ulandela lokhu okwavunyelwana ngamalunga eqembu njalo ukuza kwabalandeli ngobunengi enkundleni kutshengisa ukuba basendleleni eqondileyo labafana bakhe.

“Nxa izibukeli ezihlala eceleni leSoweto bengasabuyi yikho okuzasitshela ukuba izinto kazihambi kuhle kodwa nxa bebuya ngobunengi babo belikholisa ibhola kutshengisa ukuba konke kuhamba kuhle. Indlela esisebenza ngayo akusiso sinqumo sami kodwa yisinqumo esathathwa yimuli yeHighlanders njalo siyaxoxisana layo ukuze lapho esesiphelelwa khona sithole usizo besibonise indlela eya phambili.”

Iqembu le Highlanders lisendaweni yesithathu engalaneni yemiklomelo lilemiklomelo engamatshumi amabili lesithupha njalo litshiywa ngemiklomelo elitshumi lambili liqembu elihlezi phezu kwengalane ele Ngezi Platinum Stars.

Ngempelaviki ezayo iqembu le Bosso lizavakatshela esigodlweni iHarare ukuyadlala leqembu le Harare City ngoMgqibelo.

Imidlalo yeviki letshumi lanhlanu kodwa izabe iqale ngoLwesihlanu lapho iqembu le Black Rhinos elizemukela khona ele Chicken Inn kuthi kweminye imidlalo yangoMgqibelo iqembu leBulawayo City lizadlala lele Yadah, iqembu leHerentals lizadlala lele Nichrut kuthi iqembu le FC Platinum lizangqikilana lele Shabanie Mine.

NgeSonto iqembu leCAPS United lizemukela ele Mutare City, iqembu le Chapungu lizadlala lele ZPC Kariba, iqembu leBulawayo Chiefs lizadlala lele Ngezi Platinum kuthi iqembu leTriangle United lizadibana lele Dynamos.

Udaba Esilethulelwe NguJoseph Njanji
please wait

No media source currently available

0:00 0:01:58 0:00

Facebook Forum

XS
SM
MD
LG