Abasakhulayo abakuhlelo lweMandela Washington Fellowship abafike eMelika ngeviki edluleyo bathi sebeqalisile ukuqhuba izifundo zabo njalo bathi zihamba kakuhle.
Ontanga laba bangamatshumi ayisithupha njalo bayingxenye yabasakhulayo abavela emazweni eAfrica atshiyeneyo abayinkulungwane eyodwa abakulolu hlelo.
Omunye wabo nguNkosazana Annete Moyo, ongudokotela njalo oqhuba izifundo zobukhokheli leDuquesne University edolobheli lePittsburgh.
“Sifike kuhle kakhulu njalo samukelwa kuhle,” kutsho uNkosazana Moyo.
“Baqalise ngokusibonisa idolobho lePittsburgh, lona ke lilidolobho elihle kakhulu elilembali emnandi oyibonayo lawe lanxa uhamba nje ubona izakhiwo labantu bakhona.”
UNkosazana Moyo ukhokhela inhlanganiso ayisungule ngo2013 labanye bakhe ngenjongo yokukhuthaza abesifazana ukuthi babe ngodokotela abelapha ngokuhlinza (ama surgeon).
“Inhlanganiso yeDREAM sayisungula sisaseUniversity of Zimbabwe sijonge ukukhuthaza abesifazana ukuthi babe ngama surgeons,” kuchasise uMaMoyo.
Phakathi kwama surgeons alikhulu lasitshiyagalombili abekhona eZimbabwe ngomnyaka ka2014, kutholakale ukuthi abesifazana bebephansi kwetshumi.
UNkosazana Moyo uthi ukhangelele ukuthola ulwazi olujilileyo kuhlelo lweMandela Washington Fellowship lolu, oluzamenza enelise ukuthuthukisa inhlanganiso yakhe.
“Ngibona angani ngizabe sengihlome kakhulu ekucineni ngoba angikaze ngithole ithuba lokufundiswa ngobukhokheli,” kutsho uMaMoyo.
“Ubukhokheli bami bengibenza nje ngingela training, kodwa kathesi ngibona angani ngizaba le-foundation enhle.”