amalinks wokungena

Mandela Washington Fellowship: Sixoxa loMnu Mthabisi Ndlovu

  • Ntungamili Nkomo

UMnu Mthabisi Ndlovu

Abasakhulayo beZimbabwe abakuhlelo lweMandela Washington Fellowship basuka elizweni ngoLwesine ukuyaqhuba izifundo zabo ngobukhokheli eMelika.

Uhlelo lolu lulabasakhulayo abayinkulungwane eyodwa abavela emazweni atshiyeneyo eAfrica njalo abeZimbabwe bangamatshumi ayisithupha.

Abasakhulayo laba baya emakolitshini eMelika ahloniphekayo ukuyaqhuba izifundo eziphathelane lezamabhizimusi lobukhokheli obuqotho okwamaviki ayisithupha.

Omunye wabo nguMnu Mthabisi Ndlovu, yena olungisa amafilimu njalo osebenza labahlabeleli, ikakhulu abadabuka koBulawayo.

“Ngenza njalo inhlelo zeTV le-project okuthiwa yi‘ONVI TV’ ethuthukisa abasemsebenzini wokulibazisa uzulu koBulawayo,” kutsho uNdlovu.

“Ku‘ONVI TV’ sinikeza ama-artists akoBulawayo amathuba okuphakamisa imisebenzi yabo ngoba kayiphumi emisakazweni ekhona.”

UNdlovu uzaqhubela izifundo zakhe ngezamabhizimusi eUniversity of New Mexico. Uthi ukhangelele ukufunda okunengi okuzamphathisa ukuthuthukisa umsebenzi wakhe.

Uhlelo lweMandela Washington Fellowship lusungulwe ngo2010 ngowayenguMongameli weMelika ngaleso sikhathi uMnu Barack Obama ngenjongo yokuthuthukisa abasakhulayo bezwekazi leAfrica.

Lusungulwa uhlelo lolu lwaluyiYoung African Leaders' Initiative (YALI) kodwa uObama waguqulwa ibizo lalo ngo2014 njengendlela yokuhlonipha owaba nguMongameli weSouth Africa wakuqala onsundu uMnu Nelson Mandela.

Facebook Forum

XS
SM
MD
LG