amalinks wokungena

Mandela Washington Fellowship: Sixoxa loNomalanga Ndlovu

  • Ntungamili Nkomo

Nomalanga Ndlovu

“Kuqakathekile ukuthi sifunde ukuthi amanye amazwe ayenzani lokuthi aphumelela njani. Yiyo into engiyikhangeleleyo kakhulu.”

Lawa ngamazwi kaNkosazana Nomalanga Ndlovu, omunye wabasakhulayo beZimbabwe abaya eMelika ngoLwesine ukuyaqhuba izifundo zobukhokheli phansi kohlelo lweMandela Washington Fellowship.

UMaNdlovu ngumninibhizimusi wakoBulawayo olenkampani ethiwa yiOutspoken Consulting, efundisa abantu makhaza labosomabhizimusi ukukhuluma emphakathini, ipublic speaking.

“Kwesinye isikhathi ungaba le-product emangalisayo oyithengisayo kodwa ungehluleka ukuthi uzethule ucacile phambi kwabantu uyakwanisa ukungaphumeleli,” kutsho uNkosazana Ndlovu.

“Ngakho, ngiyabafundisa abantu ukuthi bekwanise ukukhuluma phambi kukazulu nxa belama-presentations abo kungaba ngawebhizinesi kumbe okunye nje okutshiyeneyo.”

UMaNdlovu uzaqhubela izifundo zakhe ngezamabhizimusi ekolishini leDrake University eMelika edolobheni leIowa njalo uthi ukhangelele ukuthola ulwazo olujulileyo oluzamthuthukisa empilweni.

“Into engiyikhangeleleyo yikufunda,” kutsho uMaNdlovu. “Kuqakathekile ukuthi sifunde ukuthi amanye amazwe ayenzani njalo aphumelela njani.”

Abasakhulayo beZimbabwe abaphatheke kuloluhlelo lonyaka bangamatshumi ayisithupha njalo bazaqhubela izifundo zabo emakolishini atshiyeneyo ngobukhokheli obuqotho lezamabhizimusi okwamaviki ayisithupha.

Uhlelo lweMandela Washington Fellowship luhlanganisa abasakhulayo abavela emazweni atshiyeneyo ezwekazi leAfrica abayinkulungwane eyodwa.

Uhlelo lolu lusungulwe ngo2010 luyiYoung African Leaders' Initiative (YALI) ngowayenguMongameli weMelika ngaleso sikhathi uMnu.Barack Obama ngenjongo yokuthuthukisa abasakhulayo kuzwekazi leAfrica.

UObama uluguqule ibizo ngo2014 solusiba yiMandela Washington Fellowship njengendlela yokuhlonipha owaba ngumongameli weSouth Africa wakuqala onsundu uMnu. Nelson Mandela.

Facebook Forum

XS
SM
MD
LG