Omunye wabasakhulayo abakuhlelo lweMandela Washington Fellowship uNosipho Bhebhe uthi ukhangelele ukuthola ulwazi olujulileyo kuloluhlelo oluzamenza athuthukise umsebenzi wakhe.
UNkosazana Bhebhe labanye abasakhulayo beZimbabwe abangamatshumi ayisithupha bazakuya eMelika ngoLwesine ukuyaqhuba izifundo zobukhokheli kanye lamabhizimusi.
“Ithuba leli liyangithabisa kakhulu, uyazi nxa ungumntwana yinto okhula uyiphupha ukuthi uye kwamanye amazwe uyefunda,” kutsho uNkosazana Bhebhe.
“Ngakho ithuba leli angilithathi kancane, lithiba eliqakathekileyo kakhulu kimi njalo ngiyalijabulela kakhulu ngenhloziyo yami yonke.”
UNosipho, yena osebenza labesifazana labasakhulayo eVictoria Falls, uzabe eseArizona State University lapho azaqhuba khona izifundo zobukhokheli okwenyanga eyodwa lengxenye.
Uthi ngokusebenza balantwana besikolo, uyabe ebahlomisa ngolwazi abangalusebenzisa ukuze balungiselele ikusasa labo ngokuhlakanipha.
“Sisebenza ukuhamba ezikolweni sifundisa abantwana ngamathuba abangaba lawo nxa bengaziphatha kuhle esikolweni,” uqhubeke echasisa uNkosazana Bhebhe.
