amalinks wokungena

Breaking News

Inhlanganiso Zikazulu: Mayiqhakathekiswe Inhlalakahle yeZisebenzi


Workplace Wellness
Inhlanganiso ezisebenzelana lozulu zithi sezikunanzelele ukuba kumqoka ukuqakathekisa impilakahle yezisebenzi ngokugcweleyo endaweni yokuphathisana lozulu kunhlupho zakhe kuphela engakhangeli okukhathaza izisebenzi.

Lokhu sokukhokhele ekusungulweni kwenhlelo zokukhulumisana nhlalakahle emsebenzini eze Workplace Wellness Programs ngoncedo lwenhlanganiso ephatheke kwezokucubungula indaba zegciwane kanye lengculaza emazweni angezansi kwezwekazi le Africa eye Southern African HIV/Aids Information Services –SAFAIDS.

lokhu kuphume emhlanganweni wokubonisana ngalokho abenhlanganiso lezi asethe bahlangana lakho kusukela ngesikhathi besungula lezinhlelo owe “ National Workplace Wellness Experience Sharing and Good Practices Selection Event” owenzelwe eweteleni ye Holiday Inn e Harare wangenwa ngezinye zalezi nhlanganiso esezasungula inhlelo zaloluhlobo.

Obona ngezokuqoqwa kwenhlelo enhlanganisweni ye SAFAIDS, unkosazana Beatrice Savadye utshele intathelizindaba ukuba bakubone kufanele ukuba baphathise abenhlanganiso lezi ukusungula inhlelo ze WWP ngemva kokunanzelela ukuba kayinakekelwa kangako inhlalakahle yalezi zisebenzi, kuqakathekiswa uzulu ophathiswayo.

U Savadye uthi isikhathi esinengi akekho okhumbula ngalezi zisebenzi ukuba zibhekane lenkinga lazo lanxa ziphathisa abanye ikanti engekho oziphathisa kunhlupho ezihlangana lazo okusuka kuphazamise impilakahle yazo lendlela eziqhuba ngazo umsebenzi.

Unkosikazi Khayalihle Sibanda ungomunye wabaze kulomhlangano ukuzakwethula okuphezu kwenhlelo zokunakekela izisebenzi emele inhlanganiso ye Lupane Women’s Centre.

U Sibanda yena osebenza kuhlangothi lwezokuthengiselana utshele lumhlangano ukuba seluphathise kakhulu loluhlelo lwe WWP selokhu lwasungulwa enhlanganisweni yakhe ngoba sekulokuzwisisa kwenkokheli phezu kokuqakatheka kokuzinakekela lazo izisebenzi.

Zikhohlakele isikhathi esinengi izisebenzi enhlanganisweni, kukhangelwa umsebenzi eziwenzayo kuphela hatshi ukuba lazo zihlangana lenkinga njengaye wonke umuntu njalo zidinga ukusizwa kuveza uSibanda.

Embikweni wakhe kulomhlangano,unkosikazi Sibanda uveze njalo ukuthi kunengi osekuthe kwakhangelwa ngabenhlanganiso yakhe okubalisa ukutholiswa ulwazi lemikhuhlane ehlukeneyo ebalisa engalephikiyo.

Abe SAFAIDS baveza ukuba seluthakazelelwa kakhulu loluhlelo zinkokheli enhlanganisweni lanxa bekungenjalo ekuqaleni ngoba inengi lenkokheli kanye lazo izisebenzi bezingaluzwisisi.

Bathi lanxa ezinye zalezinhlanganiso bezilazo inhlelo zaloluhlelo ezilotshiweyo, ikakhulu ezikhangela udaba lwegciwane lengculaza kuphela, abe SAFAIDS babika ukuba bakunanzelela ukuba bezisemaphepheni nje zingalandelwa lezi nhlelo zokuphathisa lokunakekela impilakahle yezisebenzi ngoba inkokheli bezingakuqakathekisi lokho.

Lezinhlelo ezifanayo ze Workplace Wellness Programmes zisungulwe emazweni abalisa ele Zimbabwe, South Africa kanye leZambia ngoba kuluhlelo lwesigaba sonke sangezwekazi ye Africa lanxa luqalwe kulamazwe amathathu kuveza abe SAFAIDS laba.
Inengi yalezinhlanganiso ebezikulomhlangano ziveze ukuba lokhe zisesekhona izikhexe ezimbalwa okubalisa ukutholiswa ulwazi ukuze zazi okunengi phezu kwezisebenzi zazo ngoba zithi kuphathisa ekuthini inkokheli zalezinhlanganiso zazi ukuba zihlele njani inhlelo zazo ekuphathiseni lezizisebenzi.

Ukusilela kwemali ekuqhubeni lumsebenzi lakho kubikwa kumgoqo ngoba ezinye zenkokheli kulezinhlanganiso zingakazinikeli ngokugcweleyo ekuthini zisekele lezinhlelo ngemali yikho okwamanje luqhutshwa ngemali evela enhlanganisweni ye SAFAIDS.

Inhlanganiso ebezikulomhlangano walamhlanje esezithe zaba laloluhlelo lwe WWP zibalisa eye Zimbabwe Lawyers For Human Rights - ZLHR,Family Aids Caring Trust - FACT Rusape,Zimbabwe Nurses Association - ZINA leye KAITE esebenzelana labalimi bemaphandleni ( Small Scale Farmers ).
XS
SM
MD
LG