amalinks wokungena

Breaking News

MDC Alliance: Isimo Esibi Sezombusazwe Yiso Esibangela Umonakalo Kusimo Somnotho weZimbabwe


Umnumzana Tendai Biti
Umnumzana Tendai Biti

Abebandla leMDC Alliance bathi isimo somnotho weZimbabwe sesifike
esibangeni esibi kakhulu kubangelwa yikungamanga kuhle kwesimo
sombusazwe ngakhoke akusoze kwaba lokuzinza elizweni nxa
kungasathathwanga amanyathelo okuwulungisisa.

Lokhu kuvezwe ngomunye wabasekeli bomkhokheli weMDC Alliance,
umnumzana Tendai Biti emhlanganweni lentathelizindaba phezu kwesimo somnotho elizweni owenzelwe emahofisini awe SAPES TRUST, eHarare, ngoLwesibili emini.

Lanxa kuke kwaba lokuxokozela ngaphambilini kwalumhlangano kubangelwa ngabacatshangelwa ukuthi ngabasakhulayo beZanu Pf, ucine uqhubeka. UBiti utshele intathelizindaba ukuba inkinga ezibhekane lelizwe zavele zabangelwa yikungaqhutshwa kuhle kokhetho ngemva kokuhluthunelwa kukamuyi uMnu Robert Mugabe intambo zombuso, ngabebutho.

"Ukuziqinisa kwabeZanu Pf lokuziqinisa kuka Mongameli Emmerson
Mnangagwa, yikwenza nje kuphela lona ilizwe libhekane lobunzima
obukhulu kwezomnotho. Sesifike kusibanga lesiyana ingcwethi
kwezokukhulumisana bathi ngesilimaza umnini waso, into zonke sezimi
mpo, kungekho okuhambayo. Sesikusibanga sokuthi akusabuyelwa emuva kungakho sizidinga lezongxoxo. Kulula kakhulu uMnangagwa amele akwenze, akhethe phezu kokuthi axoxisane loNelson Chamisa kumbe amelane lomonakalo ozakuba khona lapho uzulu esetshengisa ukukhonona kwakhe. Udubo yikuba nxa sekukuleso simo ke, kuchitheka igazi."

Ingcwethi ecubungula ezombusazwe umnumzana Mlindelwa Mancitshana uthi, " Kuyinto emgceke leyi ekhulunywa nguTendai Biti ukuthi nxa kungalungisiswanga indaba zokuqhutshwa kokhetho, ukulandelwa komthetho elizweni njalo lokukhangela amalungelo abantu ukuthi alandelwe yini, ukuvusa ilizwe leli kuzakwala kuyinto enzima. Ngoba akula phela ozalethe imali yakhe elizweni lapho abona khona ukhetho luntsontshwa, izinto ziqilwa ngendlela esegcekeni.
Kutsho ukuthi lawe nxa uthe waletha imali yakho, izabuye intshontshwe
futhi okusegcekeni kungela lapho ozakuya khona ngoba nanko phela
lamaCourts ankhona ayabe etshengisa ukuthi alohlangothi alulandelayo.
So indaba ye legitimacy iyabuyela khonaphana ukuthi ama Courts akini
aqhuba njani, indlela ama Courts ethu aqhuba ngayo, yiyo esuka
ibuyisele ilizwe phansi. Umthetho kawusebenzi, ilizwe leli lifile,
libulewe yikungalandeli umthetho, langenkethayabetshabi yona leyo
ukuthi hayi, umthetho kawusebenze uqamele icele lami kuphela."

Uqhubeke ethi ngaphandle kokuba uMongameli Emmerson Mnangagwa
akhulumisane lomkhokheli weMDC Alliance umnumzana Nelson Chamisa, eleZimbabwe alisoze lafa laphuma kunkinga elibhekane lazo kwezomnotho.

UBiti uphinde wasola kakhulu ukuphathwa okwenziwe ukuqhamuka
kwegcikwane leCovid 19 nguhulumende ongazange abambisane ngokugcweleyo labenhlangothi zonke zempilo ukuvikela uzulu nanku leli gcikwane selisidla njalo amahabula ngemva kokuthatha kwakhe inyathelo lokuvula izikolo kungela Ndlela ecacileyo yokuvikela abantwana besikolo lababalisi.

Kodwa isiphathamandla sogatsha lokwethulwa kwemibiko ebandleni
elibusayo eleZanu PF, uMnu. Tafadzwa Mugwadi, utshele lumsakazo ukuthi akakhulumi iqiniso uBiti ngoba umumo wezombusazwe bawulungisisa ngomnyaka ka2017 baze bakhuthaze uMugabe ukuba ehle embusweni bazoqhuba ukhetho olubalulekileyo ngomnyaka owalandelayo ka2018 lapho okwanqoba uMnangagwa ngakhoke abasoze balalela amanga kaBiti lebandla lakhe.

"Leyo nkinga, isekhanda legqwetha. Umuntu oligqwetha ongaziyo ukuba vele umsebenzi wakhe yiwuphi, yikho kungamangalisi ukubona ekhuluma phezu kwendaba zezemali, umnotho, ezemithetho kanye lezombusazwe. Yikwenza komuntu ozitshelayo ukuba wazi konke kodwa akusebenzi kanjalo, kumele aphelele kundaba zakhe zokuya emithethwandaba. Indaba zomnotho lezemali zinzima kakhulu kuye. Akukho angasitshela khona ngoba umhlaba wonke kanye lozulu weZimbabwe bayazi mhlophe lapho okulenkinga khona, ukuthi itholakala khona ebandleni le MDC Alliance, yinto emgceke leyo."

Kunje uthe uhulumende weZanu PF usephume lenhlelo ezinengi
zokuthuthukisa umnotho welizwe, umsebenzi wokulima, ukulungisa
imigwaqo lokunye okunengi nengi.

Udaba lwabeMDC bekhuluma ngesimo somnotho weZimbabwe siluphiwa nguMavis Gama
please wait

No media source currently available

0:00 0:03:39 0:00

XS
SM
MD
LG