amalinks wokungena

Breaking News

MDC Alliance: Sizavimba Ukhetho Nxa Izikhalazo Zethu Zingalungisiswanga


UMnu. Tendai Biti womanyano weMDC Alliance.

Umanyano wamabandla aphikisayo okhokhelwa nguMnu. Nelson Chamisa oweMDC Alliance uthi uzavimba ukuqhutshwa kokhetho nxa uhulumende engaqhubeka esala ukulungisisa konke okulakho ukwenqabela ukhetho olukhululekileyo abakhala ngakho.

Ekhuluma lentathelizindaba eHarare ngoLwesihlanu uMnu Tendai Biti, yena obemele isikhulumeli seMDC Alliance, uMnu. Welshman Ncube, ufunge wemba phansi wathi ukhetho kalusoze lwenziwe nxa izikhalazo zabo zingalungisiswanga.

Kodwa walile ukuphumela egcekeni ekuthini kuyini kahle-kahle abazakwenza.

UBiti wethule amazwi la ngaphambilini kokutshengisela okuqoqwe yiMDC Alliance ngoLwesibili ngeviki ezayo.

please wait

No media source currently available

0:00 0:03:38 0:00

UMnu. Biti uthe abafuna kulungisiswe kugoqela ukuvunyelwa yiZimbabwe Electoral Commission ukuletha ingcwethi ezizimeleyo ezizacubungula uluhlu lwabavoti olwe voters’ roll ngoba bengakholwa ukuthi luqoqwe kuhle.

Wengeze wathi eMt. Darwin kulabantu abaleminyaka yokuzalwa edlula elikhulu ababhalisela ukuvota, okuyinto athi iyabasolisa kakhulu.

“Nxa imithetho le ingakalungiswa, ngibona umongameli wethu ubezwakala, akusoze kube lokhetho. Ngeke kwaba lokhetho olunje. Akusoze kubelokhetho olungahlelekanga. Asiceli lutho olunzima la.

“Nxa abakhokheli bebandla leZANU PF beqinisile ukuthi bafuna ukhetho olusemthethweni kungalungiswa lokhu ngeviki kodwa sonke siyazi ukuthi amasotsha la awasoze akwenze lokhu.”

UMnu Biti wengeze wathi iMDC Alliance ifuna uhulumende esuse wonke amabutho abikwa ekhankasela ibandla leZanu PF emaphandleni.

Uthe njalo amabutho angamalunga eZimbabwe Electoral Commission kumele exotshwe umsebenzi ngoba ukuba khona kwawo kuzaphazamisa ukhetho njalo kuzakwenza ibandla leZanu PF liqilibezele kalula.

Idale lephalamende lipasise umthetho wezokhetho oweElectoral Amendment Act ngenyanga edluleyo. Kodwa iMDC ithi kunengi ebikhala ngakho okungafakwanga kulumthetho.

Ithi njalo kayenelisanga ukuvimba ukupasiswa kwawo ngoba ilamalunga edale lephalamende amalutshwana okwedlula aweZanu PF.

Asenelisanga ukukhulimisana lomgcinisihlalo wekomishini yezokhetho uNkosikazi Prsicilla Chigumba ngamazwi kaBiti.

Kodwa ezinye izakhamizi zeHarare zisole uBiti zisithi nxa kuyikuthi iMDC Alliance icabanga ukwenza udlakela kumele itshiyane lakho. Omunye wezakhamizi lezi nguNkosikazi Nothando Mkhwananzi.

“Umcabango weMDC owokuthi nxa ukhetho lungenziwanga ngendlela bathi bazaphambanisa angiboni ukuthi singathola lutho ngakho ngoba ekucineni asibo bodwa abazwa ubuhlungu. Lathi siyezwa ubuhlungu. Asibo bodwa abakhangelele impumela yalolu khetho.

Besengisithi kuhulumende, kabaziphe isikhathi sokulalela okufunwa ngabantu.”

Lanxa kunjalo, uBiti uthi kababuyeli emuva ngohlelo lwabo lokuvimba ukhetho mhlaka 30 ngoNtulikazi. Uthi nxa uMongameli Emmerson Mnangagwa ezimisele ukuqhuba ukhetho olukhululekileyo njengokwethembisa kwakhe, kumele elungisise izikhalazo zabo.

Ukhuthaze njalo amalunga eMDC Alliance lozulu weZimbabwe jikelele ukuthi baze eHarare ngobunengi ngoLwesibili bazephatheka kuhlelo lwabo lokutshengisela phezu kwenguquko abayifunayo le.

Uthi bazatshengisela besiya emahofisini kaMnangagwa aseMunhumutapa lasemahofisini ekomishini yezokhetho iZEC.

Facebook Forum

XS
SM
MD
LG