Inhlanganiso elwela ilungelo loluntu lokunye okubhekane lozulu eyeCrisis in Zimbabwe Coalition ithi ukukhahlanyezwa kwabalandeli bebandla leMDC Alliance ngabacatshangelwa ukuba ngabasekeli bebandla leZanu PF kuveza ukuthi kuzabe kuxokozela okumangalisayo ngokhetho oluzakwenziwa ngomnyaka ka2023.
Inhlanganiso le iyakusola kakhulu ukukhahlanyezwa kuka Mnu. Nelson Chamisa labalandeli bakhe eMasvingo ngabacatshangelwa ukuba basekela ibandla leZanu PF ngesikhathi bezama ukwenza imihlangano esabelweni lesi.
Yethule lokhu enkundleni yokuxhumana eyeTwitter isithi kumele amapholisa avimbe abakhahlameza abamabandla aphikisayo ukwenzela ukuba kube lokhetho olubalulekileyo ngomnyaka ka2023.
UGift OStallos Siziba, obehamba loChamisa eMasvingo, uthi ibandla leZanu PF liyamesaba kakhulu uChamisa.
Lokhu kusekelwa nguMnu. Felix Magalela Mafa, umsekeli wesikhulumeli sebandla leMDC Alliance.
UMnu. Joseph Tshuma, okubandla leZanu PF, uthi udlakela kalulunganga.
Amabandla aphikisayo athi uhulumende kumele akhuthaze amapholisa ukuba asebenze ngemfanelo hatshi ukwekela abalandeli bebandla leZanu PF besenza santando.
