UMnu. Lovemore Moyo, obengumgcinisihlalo webandla leMDC-T, uthi usetshiyile ibandla leli eselikhokhelwa nguMnu. Nelson Chamisa.
UMoyo uthi kazimiselanga ukusebenza labantu abakhahlameza abanye njalo abephula isisekelo sombuso webandla leMDC-T.
Uthi uChamisa kangenanga ngemfanelo esikhundleni sikamongameli webandla leli ngakho-ke angeke abonakala esebenza labantu abanje.
Umcebisi wakhe, uMnu. Artwell Sibanda, uthi uMoyo kasoze asebenzelane lamabandla anjenge National People’s Party elikhokhelwa nguNkosikazi Joice Mujuru lamanye afanayo kanye loNkosazana Thokozani Khupe, osanda kusuka kucele leMDC-T elikhokhelwa nguMnu. Chamisa.
USibanda uthi okwamanje uMoyo usahlolisisa angekwenza lobanje kusobala ukuthi ufuna ukusebenza labantu ababhekane lenhlupho zabantu ezabelweni zeMatabeleland.
UChamisa loMaKhupe babanga isikhundla esatshiywa ngumuyi uMorgan Tsvangirai. Inhlangothi zebandla leMDC-T sezikhethe uChamisa ukuthi abambe isikhundla lesi njalo angene.
