amalinks wokungena

Breaking News

MDC-T Bulawayo: Sizakwazisa NgoMgqibelo Ngokuxotshwa Ebandleni KukaMnu. Moyo


MDC-T
MDC-T
Ibandla leMDC-T koBulawayo lithi lizakwasisa ngoMgqibelo ukuthi selimise kancane umnumzana Gorden Moyo ukuba ngumgcinisihlalo walo kulelidolobho kulandela ukuxotshwa kwakhe yisigaba asimelayo edale lephalamende eseMakokoba.

Amalunga eMDC-T eMakokoba athi kasafuni uMoyo amele lesisigaba edale lephalamende ngoba ekhanya esekela icele lalelibandla elikhokhelwa ngumnumzana Tendai Biti.

Idale leBulawayo Provincial Council lithi lizahlangana ngoMgqibelo lazise ngokumiswa kukaMoyo ukuba lilunga andubana azivikele kumacala awetheswayo kanye lokuxotshwa kwamalunga ephalamende akucele likaBiti, abalisa umnumzana Sam Sipepa Nkomo, uReggie Moyo, lomnumzana Bekithemba Nyathi.

Ikhomidi ebona ngokuqoqwa kwenhlelo kulelibandla koBulawayo ikhangelelwe ukuhlangana ngoLwesihlanu ntambama ikhangela udaba lolu kanye lokunye okuhluphayo.

UNtungamili Nkomo weStudio Seven uxhume umqoqi wenhlelo zeMDC-T koBulawayo umnumzana Albert Mhlanga. UMhlanga uthi uMoyo ngumgane wakhe aphile laye okwesikhathi eside kakhulu njalo uthi kuyamdanisa ukubona sethathelwa amanyathelo libandla alisebenzele kanzima.
XS
SM
MD
LG