amalinks wokungena

Breaking News

UMugabe Ulakho Ukubanjwa Ngenkani Ukuthi Afakaze Ephalamende Ngemali Yamadayimana Eyatshontshwayo


Owayengumongameli weZimbabwe, uMnu. Robert Mugabe, ulakho ukuthunyelwa amasamanisi lidale lephalamende engehluleka ukuziveza mhlaka 11 ngoNhlangula.

Lokhu kulandela ukwehluleka kwakhe ngoMvulo langeviki ephelileyo ukuthi azexoxisana lamalunga edale lephalamende ngokutshontshwa kwemali efika amabhiliyoni alitshumi lanhlanu eyatholakala ekuthengiseni amadayimana eZimbabwe.

UMnu. Temba Mliswa, umgcinisihlalo wekhomithi yedale leli ebona ngokwenjiwa elizweni, utshele intathelizindaba eHarare ukuthi banika uMugabe ithuba lokucina lokuziveza kukhomithi le.

UMliswa uthi bazathuma amapholisa ukuthi bayemnika amasamanisi nxa engehluleka ukubuya edale leli.

“Sivumelane sonke ukuthi simbhalele incwadi simazisa ukuthi sifuna ukumbona mhlaka 11 June emini. Kuncwadi le sizamtshela ukuthi lokhu sikwenza ngamandla aphi. Engehluleka ukubuya sizamthumezela amasamanisi. Asiyonto esiyifisayo njalo sifisa ukuthi kungenzakali lokhu. Njengomuntu owayengumongameli welizwe leli ungumuntu ohloniphekayo njalo sithi ukuthi simhloniphe besicela ahloniphe imithetho yelizwe leli. Kajeziswa, sifuna ukumuzwa ekhuluma ngodaba lolu kuphela njalo siyamhlonipha.”

Kodwa-ke ingcwethi kwezemithetho, uMnu. Matshobana Ncube, uthi idale lephalamende lingeke lethula isigwebo sokuvalela uMugabe njengalokhu okwehlela umuyi uRoy Bennet owahanjiswa entilongweni kulandela ukulwa kwakhe lamalunga edale lephalamende.

UBennet wafuqa uMnu. Patrick Chinamasa wamlahla phansi kulandela inkulumo kaChinamasa ethi abantu abamhlophe babengamasela.

UNcube uthi ukuvalelwa kuka Bennet kwenza ukuthi idale lephalamende lithathelwe amandla kusisekelo sombuso selizwe okugweba abantu kusetshenziswa imithetho yelizwe.

Uthi imithetho yedale lephalamende yayisetshenziswa ekujeziseni labo ababelabantu abaluntshwana kudale leli.

Ingxoxo Esiyenze LoMnu. Matshobana Ncube
please wait

No media source currently available

0:00 0:02:04 0:00

Osakhulayo, uNkosikazi Nomathemba Nyoni, uthi kusobala ukuthi uMugabe kasoze alugxobe ephalamende okutshengisa ukuthi inhlangothi zomthetho zikahulumende azilamandla.

“Ngokubona kwami bekusegcekeni ukuthi uMnu. Robert Mugabe ubengasoze abuye ephalamende. Ukungabuyi khona kutshengisa ukuthi iphalamende ayilawo amandla okufaka izahlulelo lokujezisa umuntu owehluleka ukuhlonipha idale leli. Lokhu kutshengisa ukuswelakala kwamandla kwephalamende lezinye ingxenye zika hulumende.”

Ingcwethi kwezombusazwe, uMnu. Tjenesani Ntungagwa, uthi uMliswa labanye bakhe yibo abalenkinga ngoba abazi ukuthi bazakwenzani nxa uMugabe engaqhubeka esala ukuhlangana labo.

“Ngokubona kwami ma engabuyanga okokuqala akulathemba ukuthi uzabuya. Bona kumele bekhulume ngomthetho wephalamende ukuthi umuntu ongabuyanga wenziwani. Okwakhathesi ngokubona kwami kwami bona yibo abalenkinga ngoba abakwazi ukuthi bazamenzani ma engabuyanga. Kwake kwabalehungahunga lokuthi bazamlanda emzini wakhe asazi ukuthi kwaphetha ngani. Bona kumele becace.”

UMugabe kakakhulumi ngokungabuyi kwakhe njalo akwaziwa ukuthi ucabangani ngodaba lolu.

Ukweyiswa kwedale lephalamende lamandla alo abonakala kuphela kujeziswa uBennet.

Udaba Esilethulelwe NguGibson Bhebhe
please wait

No media source currently available

0:00 0:03:27 0:00

Facebook Forum

XS
SM
MD
LG