UMongameli Emmerson Mnangagwa uthi kulamalunga ebandla lakhe leZANU PF afuna ukuthi engangena edale lephalamende amsuse embusweni nge “impeachment” ngemva kokhetho oluzayo.
UMnu. Mnangagwa ubekhuluma emhlanganweni wokukhumisana umlotha phakathi kwabanqobayo labanqotshwayo kukhetho lwama primaries alelibandla, lapho abanye abathi baqilibezelwa khona.
“Kulabanye abasanda ukunqoba kukhetho lwama primaries abanqobe ngokuqilibezela, njengokubhadala abanye imali ukuthi bevotelwe ukwenzela ukuthi bengangena ephalamende bengisuse embusweni nge impeachment. Kodwa ukuze ususe omunye embusweni, kufanele ubelesiqiniseko sokuthi ungakwenza lokho ngoba isisekelo sombuso sicacile kukanti eseZANU PF sithi kukhutshwa umuntu ongasowebandla ngokupheleleyo, “ kutsho uMongameli Mnangagwa.
Asizweni amazwi akhe.
Ukuze sihlaziye loludaba, sixoxe loMnu. Bernard Bhekilizwe Ndlovu, ingcwethi ecubungula ezombusazwe, yena othi kulengxabono enkulu kubandla leZANU PF.