Umongameli Emmerson Mnangagwa uthi indlela yokwaba umuthi wokwenqabela i-COVID 19 owama vaccines isicandiwe njalo abazahlatshwa kuqala ngabasebenza kwezempilakahle, kulandele asebeluphele lalabo abavele beleminye imikhuhlane okwazakala ngokuthi ngama underlying conditions ngesiNgisi.
Ekhuluma ngoLwesihlanu emhlanganweni wakuqala lonyaka owomanyano wamabandla ezombusazwe owePolitical Actors Dialogue-POLAD, umongameli Mnangagwa uthe uzakwazisa ngeviki ezayo ukuthi i lockdown ekhona elizweni eyokwenqabela ukumemethekwa kweCOVID 19 iyaqhubeka kumbe hatshi.
Uphinde watshayela ihlombe umanyano wePOLAD, wathi wemukele izikhalazo zawo zokuthi kube lenguquko kunhlelo zokhetho njalo kulungiswe okuhluphayo kusisekelo sombuso.
Ukuhlaziya loludaba, sixoxa lengcwethi ecubungula ezombusazwe, uMnu. Mbuso Fuzwayo, esiqale ngokumbuza.