amalinks wokungena

Breaking News

UMnangagwa Uthi iZimbabwe Izakwenza Ukhetho Olubalulekileyo


UMongameli Emmerson Mnangagwa laba

UMongameli Emmerson Mnangagwa uthi uhulumende useyenze konke okusemandleni akhe ukubona ukuthi ukhetho oluzakwenziwa ngoMvulo luzabe lungolukhululekileyo.

UMnangagwa wethule linkulumo kunkokheli zamazwe eAfrica lezamazwe enhlanganiso ye BRICS eJohannesburg ngoLwesihlanu.

Esethula inkulumo yakhe emhlanganweni lo ongenwe zinkokheli zamazwe abenxuswe yinhlanganiso yeBRICS, uMnangagwa uthe lobanje iZimbabwe ibhekane lokhetho ngoMvulo, ukubone kuqakathekile ukuthi aze kulo umhlangano ezokwabelana lezinye inkokheli amacebo entuthuko.

Ubaphe isiqiniseko esithi ukhetho lweZimbabwe luzakhulisa ukuhlonitshwa kwentando kazulu kantike luzalandela imithetho yezokhetho eyethulwa yinhlanganiso yamazwe asezansi yezwekazi leAfrica eyeSADC.

“Ngiyabonga amaqula azobheka ukhetho amanye awo avela emazweni eBRICS, wona emukele unxuso lwethu ukuzosincedisa kulolukhetho oluqakathekileyo. Ngiyalithembisa zinkokheli ukuthi konke sekwenziwe okuzakwenza ukuthi lolukhetho lubengolukhululekileyo, olungelamfihlo, lungeladlakela lube njalo ngoluhloniphekayo.”

Esekhuluma ngokunxuswa kweZimbabwe emhlanganweni wamazwe eBRICS, umongameli Mnangagwa uthe iZimbabwe iqakathekisa kakhulu inhlanganiso yeBRICS wathi yinhlanganiso engasizana kakhulu leZimbabwe kwezentuthuko.

Uthe njalo manengi amathuba amabhizimusi eZimbabwe avulekileyo kulabo abafuna ukusungula amabhizimusi.

Kodwa-ke ngesikhathi uMnangagwa esethula inkulumo yakhe, kunkokheli zamazwe, ezinye izizalwane zeZimbabwe bezise Consulate eJohannesburg ndawonye lenhlanganiso yeZimbabwe Solidarity Forum ebisiyakwethula umbiko otshengisa ukuthi kunengi okusafuze kulungiswe ukuze ukhetho lube ngolukhululekileyo.

Omunye walaba unobhala webandla leZimbabwe Communist Party, uMnu. Ngqabutho Mabhena, uthe ubufakazi obugoqela ukwethuselwa kwabantu lokungasebenzi kuhle kwekomishini yezokhetho iZimbabwe Electoral Commission kukhombisa ukuthi lolukhetho ngeke lube ngolukhululekileyo.

“Asiboni ukuthi ukhetho luzabe lukhululekile ngendaba zokuthi amabandla aphikisayo akhala ngevoters roll, akhale futhi ngeballot paper ngoba iZimbabwe electoral commission iyala ukuthi iphepha okuzabe kuvotwa kulo litestwe ukuthi babone ukuthi lokhu abakutshoyo ukuthi uX angasuka esiyahlala komunye akusoze kwenzakale.”

Ngokutsho kombiko wenhlanganiso yeSolidarity Forum obhalwe ngemva kokuba amalunga ale inhlanganiso eye ukuyaqapha amalungiselelo okhetho eZimbabwe, abantu bayethuselwa, kwezinye indawo kulamasotsha okuthiwa azoxasa ezokulima, kanti ukusebenza okungaphumeli obala kwekomishini yezokhetho iZEC, sekutshiye kulokuthandabuza ukuthi kambe ukhetho luzaba ngolukhululekileyo na?

Udaba Esilethulelwe NguBenedict Nhlapho
please wait

No media source currently available

0:00 0:00:08 0:00

Facebook Forum

XS
SM
MD
LG