amalinks wokungena

Breaking News

UMnangagwa Uthi Uzimisele Ukuvuselela Umnotho ‘Owabhidlizwa Yizijeziso Zenotho’


UMongameli Emmerson Mnangagwa

UMongameli Emmerson Mnangagwa uthi uhulumende wakhe uzimisele ukuvuselela umnotho welizwe athi wabhidlizwa yizijeziso zenotho ezafakwa ngamazwe angentshonalanga.

UMnangagwa, ucele njalo osomabhizimusi beBotswana ukuthi bavule amankampani eZimbabwe.

Ekhuluma emhlanganweni wabamabhizimusi beZimbabwe le Botswana, owe Botswana, Zimbabwe Business Forum eGaborone ngoLwesibili, uMnangagwa uthe zinengi inhlangothi zezomnotho abeBotswana abangena kizo eZimbabwe.

"Selizigaba ezinengi lapho elingangena khona okugoqela ukwembiwa, uhlangothi lokwenza imphahla etshiyeneyo kanye lokwakha."

UMnangagwa uthi ngenxa yesikhathi eside esesidlule umumo womnotho eZimbabwe ungamanga kahle, kunengi osokonakalayo egcona izijeziso ezafakwa ngamazwe angentshonalanga agoqela eleMelika, eleBhilithani kanye lomanyano we European Union.

“Salinyazwa kakhulu yizijeziso ngakho umnotho wayehla kakhulu. Inhlangothi ezinengi zomnotho welizwe zabuyela emuva, okutsho ukuthi kulezigaba zomnotho ezinengi ezidinga ukuvuselelwa."

Abamabhizimusi avela phandle kwelizwe kade bekhala ngokuthi eleZimbabwe lilemithetho elukhuni njalo umkhathi wokwenza ibhizimusi eZimbabwe awukhangi abangabebefisa ukuvula amabhizimusi.

UMnu. Emmerson Mnangagwa uthi ilizwe lakhe lizimisele ukuthuthukisa umnotho weZimbabwe.
UMnu. Emmerson Mnangagwa uthi ilizwe lakhe lizimisele ukuthuthukisa umnotho weZimbabwe.

Kodwa uMnangangwa, owathatha isikhundla ngoLwezi nyakenye, uthi konke lokhu kuzantshintsha sekule Zimbabwe entsha eyamukela abafuna ukuvula amabhizimusi.

"Siyakwazi ukuqhakatheka kokukhanga amabhizimusi avela phandle ukuze sithuthukise umnotho wethu. Sikhipha imigoqo yonke evimbela ukwenza ibhizimusi eZimbabwe."

Umphathintambo weBotswana obona ngezokuthenga lokuthengiselana, umnunzana Vincent Seretse, uthi kuqakathekile ukuthi ohulumende bobabili ukuthi bakhiphe imigoqo evimba ukuthenga lokuthengiselana phakathi kweZimbabwe leBotswana.

"Ngikhuthaza amazwe womabili ukuthi akhulumisana ngezamabhizimusi ukuze sekhulise ukuthenga lokuthengiselana phakathi kwamazwe womabili."

Inhlanganiso ezibona ngezebhizimusi emazweni womabili, iBotswana Investment and Trade Centre kanye le ZimTrade, zilobelane isivumelwano sokuthenga lokuthengiselana, esikhangelelwe ukuthuthukisa ezamabhizimusi phakathi kwamazwe womabili.

Esuka kumhlangano wabamabhizimusi, uMnangagwa wethekelele inkampani yeDiamond Trading Company, esiyafunda ukuthi eleBotswana lenza njani kubhizimusi lokwemba lokulolonga amadayimani.

UMnangagwa lequla lakhe, elibalisa abaphathintambo bakahulumende labosomabhizimusi, baphindele eZimbabwe ngoLwesibili ngemva kwamalanga amabili okwethekelela eBotswana.

Facebook Forum

XS
SM
MD
LG