amalinks wokungena

Breaking News

Mohadi: Sizakwamukela Impumela Yokhetho Lanxa Sinqotshiwe


"Odliweyo udliwe, onqobileyo unqobile.I-ZANU PF ayisiyo elamandla, abantu beZimbabwe yibo abalamandla. Abantu bangasikhupha siyaphuma,singenzani?" kutsho uMnuz. Mohadi.

Umsekeli kaMongameli welizwe uMnu Kembo Mohadi uthi ibandla leZanu PF lizakwamukela impumela yokhetho lingaze linqotshwe.UMohadi uveze lokhu eseGungwe eGwanda South lapho obekusungulwa ngokusemthethweni iviki yokunanza amasiko ngoMgibelo.

Ekhuluma lentathelizindaba ngemva kokwethula umbiko wokunanzwa kweviki yamasiko eyeCulture week uMohadi uthe ibandla leZanu PF lizimisele ukuqhuba ukhetho olulokuthula njalo ukhuthaze izakhamizi zeBolamba ukuthi zimanyane,zisebenze ndawonye ukuze ilizwe lithuthuke.

Lapho simbuza ukuthi bazakwamukela na impumela yokhetho lapho bethe banqotshwa uMohadi uthi abasoze bagenqula uhulumende okhethwe nguzulu.

"Odliweyo udliwe, onqobileyo unqobile.I-ZANU PF ayisiyo elamandla, abantu beZimbabwe yibo abalamandla. Abantu bangasikhupha siyaphuma,singenzani? ngoba liyabe selisiphikile.I-ZANU PF ayibuswa libutho njalo ayisilo ibutho,ayikho kunkamba zebutho.KuOperation Restore Legacy asobutho elathatha umbuso, kwaba ngumvukela wabantu lephalamende. Wonke umuntu wathi kahambe uMugabe.Ngabe kwakulibutho wayezabotshwa kodwa uzihlalele kuhle lemuli emzini wakhe kazange wahlukuluzwa," kutsho uMnu. Mohadi.

UMohadi uthi kakwazi lokuthi kuqilibezelwa njani kukhetho njalo uthi ikomishini ebona ngokhetho eyeZimbabwe Electoral Commission Izec iluhlangothi oluzimele lodwa olungelani lebandla leZanu PF.Uthi bavumelana lamabandla aphikisayo ukuthi kubunjwe likomishini:

"Angazi mina ukuthi kurigger njani njengoba ngivele ngingazi lokuthi unqotshwa njani kukhetho.Angazi ukuthi bakuthatha nga ukuthi iZanu PF izaqilibezela kukhetho.Ukhetho luqhutshwa yiZEC ezimele yodwa akulamuntu weZanu PF kuZEC, angazi ukuthi bakuthatha nga lokhu."

Esethula umbiko wakhe wezamasiko uMohadi uthi kubalulekile ukuthi uzulu akhumbule amasiko akhe ikakhulu ngalesisikhathi kukhagelelwe ukhetho.Uthi uzulu kumele ahlalisane kuhlelanxa kulokwehlukana kwembono ngezombusazwe.

"Bakithi sivela khatshana njalo sokuyisikhathi sokuthi lelilizwe liphumelele, singakwenza lokhu nxa sibambene, kulokuzwanana.Akumelanga sixabane. Sikhuthaza izizalwane zeZimbabwe ukuthi zihambe kukhetho ngokuthula, kungabi lokuxokozela siqhube ukhetho olungela ngxabano," kutsho uMnu. Mohadi.

Wengeze wathi umhlaba uzimisele ukuncedisa eleZimbabwe kodwa usafuna ukubona ukuthi kambe ukhetho luzaqhutshwa ngokuthula na kungela kukhonona:

"Njengomsekeli kaMongameli,ngike ngathunywa nguMongameli ngisiya emazweni aseAsia leEurope ngisiyabatshela ngombuso wethu lalokhu esikumelayo.Bathi okwakhathesi siyenza kuhle kodwa basamelele ukubona kuqhutshwa ukhetho ngokuthula kungela kuthandabuza ngempumela.Singehluleka ukwenza lokhu umhlaba uzasijikela,okuncweba indlebe ngowakho."

Kulumkhosi, lapho obekunanzwa khona isiko labaBirwa, bekuleziphathamandla zikahulumende ezibalisa oMnu. Abednico Ncube lo Kazembe Kazembe, izinduna, amalunga edale lephalamende kanye lezakhamizi zeBolamba.

please wait
Embed

No media source currently available

0:00 0:03:20 0:00

Facebook Forum

XS
SM
MD
LG