amalinks wokungena

Breaking News

Uyakhala Umlandeli weMthwakazi Republic Party Owadutshulwa Edinga uMqondisi Moyo Enkambeni Yamapholisa


FILE: Abanye ababotshwa eCentral Police Station ngoLwesithathu abetheswa amacala okutshengisela enkambeni le. (Courtesy Photo: Mthwakazi Republic Party)

Uyakhala uMnu. Khethani Nxeba Ndlovu, olilunga leMthwakazi Republic Party, owadutshulwa phandle kwenkamba yamapholisa koBulawayo ngesikhathi kundingwa umkhokheli wakhe, uMnu. Mqondisi Moyo, okwakuthiwa ubotshiwe.

UNdlovu uthi walimala kakhulu kodwa kahambanga esibhedlela esiphethwe nguhulumende ngenxa yokuthi kwakuzafunakala incwadi yamapholisa eveza ukuba ulinyazwe yini.

Uthi usehambe kudokotela ozimeleyo olokhu ehlolisisa izilonda zakhe.

UNdlovu uthi kukhanya engani ulenhlamvu zombhobho ezimbalwa emzimbeni.

Uthi bazama ukuzivikela ngosuku bedinga uMoyo eBulawayo Central Police Station, okwakukhanya engani wayevalelwe khona kulandela imibiko yokuthi kulabantu abazama ukumthumba ebusuku evela eNtabazinduna lapho amalunga eMRP abavimba uMnu. Floyd Ambrose, owayezama ukuthathela uMnu. Brian Davies izakhiwo epulazini okuthiwa labelwa abantu abambalwa. UFloyd usekela ibandla leZanu PF.

Kusenjalo, amapholisa aqhubekela phambili ebopha abalandeli bebandla leMDC Alliance aqoqa imihlangano endaweni ezitshiyeneyo. Aqoqa imihlangano okufuna lokwenziwa libandla leZanu PF elilemihlangano eminengi ezabelweni zonke zelizwe.

Amapholisa asanda kubopha abalandeli bebandla leMDC Alliance eMasvingo, Mashonaland West kanye leHarare abethesa amacala okwephula iziqondiso zohlelo lokuvalelwa kwabantu ezindlini olweCOVID-19 lockdown.

Lokhu kusolwa ngumanyano wezwekazi leEuropean Union owethule umbiko enkundleni yeTwitter othi kukhanya engani imithetho eZimbabwe isetshenziswa ukuncindezela uzulu.

UMnu. Ned Price, isikhulumeli sohlangothi lukahulumende olubona ngokudlelana lamanye amazwe, uthi akumelanga ibandla leZanu PF lisebenzise imithetho ngendlela eveza ukuba lifuna ukuncindezela uzulu.

UMnu. Kazembe Kazembe, ophethe uhlangothi lukahulumende olubona ngezemithetho, uthi kungamanga ukuthi basebenzisa imithetho ngendlela encindizela amabandla aphiisayo.

UMnu. Simon Khaya Moyo, isikhulumeli sebandla leZanu PF, uthi bakhuluma abangakwaziyo abantu bakwele Melika kanye lomanyano weEuropean Union.

Ingxoxo Esiyenze loMnu. Khethani Nxeba Ndlovu
please wait

No media source currently available

0:00 0:01:24 0:00


Facebook Forum

XS
SM
MD
LG