amalinks wokungena

Breaking News

UMthuli Ncube Uthi Umnotho Welizwe leZimbabwe Uzathuthuka Nge7,5% Ngomnyaka Ozayo


Umgcinincebo kahulumende wakwele Zimbabwe, Mthuli Ncube.

Umphathintambo wezemali, uMnu Mthuli Ncube, ngoLwesine wethule uluhlu lwendleko kahulumende lokubuthaniswa kwemali yelizwe, iNational Budget yomnyaka ozayo, efika amabillion edlula amakhulu amane amadollar eZimbabwe - $421 billion.

Ekhuluma emkhosini wokwethula iBudget le edale lephalamende, uNcube uthe uzulu weZimbabwe usetshengisa ukuthemba uhulumende esithi lokhu kubonakale embuthanweni yokuthola imibono yabantu ngendleko kahulumende.

KuBudget yalonyaka uhulumende wabele imali enengi kugatsha lweMfundo olwePrimary leSecondary, oluthole amabillion edlula amatshumi amahlanu lengxenye-RTGS$55,2 billion lulandelwa ngolwezempilakahle oluthole amabillion edlula amatshumi amahlanu - $54.2 billion.

UNcube uthe umkhuhlane weCOVID-19 udale umonakalo omkhulu kusimo somnotho welizwe ngakho-ke bakubone kufanele njengohulumende ukunakekela abantwana kubudget yalonyaka.

“Sizathenga ama PPEs. Uhulumende uyavuma ukuba abantwana abangamankazana bathwele nzima ngalezi zikhathi njalo sifuna ukwehlisa indubo zabo. Sizakupha abantwana imvunulo yokuqgoka ngesikhathi besesikhathini. Sizakupha imali engange $55.2 billion kugatshwa lwezemfundo yaphansi.”
Umgcinisihlalo wekhomithi yezemfundo edale lephalamende, uNkosazana Priscilla Misihairambwe, uthi lokhu kuyatholozisa.

“Ngithabile ukuba siyikhulumile indaba le. Kodwa kumele ngikhangele ukuba imali lezi zizaphuma. Kumnyaka odluleyo bengiphiwe $200 million, khathesi unginike 500 million. Kuzamele sikhangele ukuthi bathenga isanitary wear engakanani.”

Umkhokheli webandla eliphikisayo eleMDC-T, uNkosazana Thokozani Khuphe, uthi ulethemba lokuba libudget kuzamele ithuthukise impilo kazulu.

“Ungakhangela ibudget le, umphathintambo ukhulume ngenombolo. Osokusele yikuba ibudget le ibone ukuthi abantu bayathola izibhedlela, kufanele ibone ukuba abantu bayathola ukudla, abantwana befunde kuhle. Kube lamanzi ahlanzekileyo.”

Ingcwethi kwezombusazwe lezomnotho, uMnu. Masimba Kuchera, uthi lobanje ibudget yalonyaka ikhangele indubo ezibhekane labanengi, kuqakathekile ukuba incede abantu bonke.

“Kukumelanga kube lenkethabetshabi, yikho esesikukhangela ukuba izikolo zizathola njalo leyo mali. Kuyinto okumele siyamukele ekhulunye ngu baba uNcube”

UNcube uthe uhulumende we Zimbabwe uzakwehlisa indleko yakhe yeholo lezisebenzi, ngokwehlisa indleko yama subsidies, njalo uzaqakathekisa ukupha ilizwe lithole imali kugatsha lwezokwemba.

Uthi kuzaba lemali ezakuya kunhlelo zokuthuthukisa izigaba olweDevolution of Power engaba ngamabillion phose angamatshumi amabili - $19.5 billion amadola eZimbabwe.

Imali ephiwe ugatsha lwezokulima ifika ikumabillion edlula amatshumi amane - $46,3 billion, imali ugatsha lwezamankampani ifika amabillion edlula amabili -$2.3 billion, kuthi olwekwethekelwa kwelizwe luthole amabillion phose amabili -$1,8 billion.

UNcube ugcizelele esithi uzakupha imali yokuba umgwaqo ohlanganisa iBeitbridge leHarare ube usuphelile ngomnyaka ka2022, kuthi uhlelo lwamanzi olweMatebeland Zambezi Water Project wathi lalo kumele luqakathekiswe.

UMthuli Ncube Uthi Umnotho Welizwe Uzathuthuka Kahle Ngomnyaka Ozayo
please wait

No media source currently available

0:00 0:04:52 0:00


Facebook Forum

XS
SM
MD
LG