Umphathintambo obona ngezemali, uMnu. Mthuli Ncube, uthi eleZimbabwe kalisoze lafa labuyela ekusebenziseni idola leMelika ngoba liqine kakhulu okwenza liphambanise ukusebenza kahle kwamankampani elizweni.
“Hatshi asibuyeli kuUS dollar, iUS dollar yimali eqine kakhulu ebulala ilizwe, ibulala amankampani, amankampani kasenelisi ukucompeta ledola leli. So kuqakathekile ukuthi I Zimbabwe ibe lemali yalo, silayo iZimbabwe dollar kumele siyi supporte”
UNcube ukhangelelwe ukuthi ngoLwesithathu uzakwethula umbiko oqakathekileyo ophathelane lesimo somnotho lezemali eZimbabwe emhlanganweni obizwa ngokuthi yiRound Table oqonqwe yinhlanganiso yeMacroeconomic and Financial Management Institute of Eastern and Southern Africa.
“NgoLwesithathu siyabe sile Round Table on Zimbabwe eWorld Bank. Ngizabe ngipresenta ukuthi khona bazwisise ukuthi senzani eZimbabwe, amaeconomic reforms, kufiscal, kumonetary, kuprivatization, kuinfrastructure development lakumalegislative reforms ukuthi bazwisise ukuthi senzani under the stabilization transition program.”
Ebuzwa ngokuthi kuyini azakwethula okutshiyene lakwethule nyakenye njengoba ingcwethi zenotho emhlabeni jikelele zisithi okufunekayo eZimbabwe yikulandelwa kwemithetho, ukuhlonitshwa kwelungelo loluntu, ukwenqabelwa kwenkohlakalo lokunye, uthe manengi amanyathelo asethethwe nguhulumende wakhe.
“IZimbabwe has changed khathesi uzananzelela ukuba sokule rule of law, sokwabunjwa iAnti-Corruption Commission eyenza umsebenzi oqakathekileyo sibili ukuthi kungabi le corruption, that is one example etshengisa ukuthi iZimbabwe iyantshintsha sokule rule of law.”
EleZimbabwe lingena imihlangano yeIMF leWorld Bank minyaka yonke lanxa abanengi besithi kukhanya kungaguquli lutho njengoba eleZimbabwe liyabe lilokhu lifakelwa imigoqo elingenelisi ukuthi liyilandele andubana liphiwe uncedo lwemali. Ilizwe leZimbabwe liyabe lilokhu likhala ngezijeziso zenotho elithi yizo eziphazamisa intuthuko yomnotho welizwe.
