Umphathintambo wezemali uMnu. Mthuli Ncube namuhla wethule uluhlu lokusetshenziswa lokubuthaniswa kwemali nguhulumende olweNational Budget yomnyaka ozayo, olubiza amatrillion phose angamatshumi ayisithupha amadollar aweZimbabwe-ZW$58.2 trillion.
UNcube ubike ukuba imali enengi izavela kumithelo. Uthe kukhangelwe ukuba umnotho uzathuthuka ngokwedlula isilinganiso sokuhlanu lengxenye ekhulwini lonyaka ngenxa yesivuno sezilimo ebesiphezulu lonyaka kanye lokwenjiwayo.
Uphinde wathi umnotho uzancipha kancane ngomnyaka ozayo ngoba kuzakuba lesikhudumezi seEl Nino esizakwenza kukhwamalale elizweni lonke.
Abantu abanengi bakhala ngokuthi kuzahle kudale inhlupho kulabo abangabayanga ngenxa yokukhuphuka kwentengo yempahla lokudla lapho imthetho ikhwezwa.
Ekhuluma esedale lephalamende elitsha eMount Hampden, uNcube uthe uzathatha imali kumithelo efana lokukhweza ama-toll gates, owokungena kwemphahla elizweni oweVAT, yokunathwayo okuletshukela enengi, eyezimota lokunye.
UNcube uchasisele intathelizindaba zeStudio 7 ngemithelo ayibekileyo esithi lokhu kuzancedisa ukuba ilizwe lithole imali yokusekela inhlelo zika hulumende.
Uqhubeke esithi labo abasemisebenzini yokuthengisa kumele benze lokhu belamaphepha asemthethweni esithi nxa bengela maphepha kabasenelisi ukuthenga kumankampani alungisa impahla kumbe ezitolo ezinkulu zamaWholesale.
UNcube uphinde watshela idale lephalamende ukuba uhulumende usezakwenza ukuba izisebenzi zikahulumende zenelise ukubhadala imali ye-pension isuka kumali ebizwa kuthiwa ngama COVID-19 allowances eholwa ngedola leMelika.
UNcube uthe iholo lemali ephansi kwamadola azinkulungwane eziyisikhumbosa lengxenye - $ZWL750,000 kayiselakho ukubhadalelwa umthelo.
Inengi lithi imali eyethulwe nguMthuli kayeneli lisithi ukukhwezwa kwemithelo kuzasinda kakhulu abangabayanga.
Omunye wabatsho lokhu ngomela iLuveve edale lephalamende, uMnu Discent Bajila yena osole ibudget kaNcube.
Lokhu kusekelwe yingcitshi ecubungula ezombusazwe esebenza izimele uMnu Masimba Kuchera othi okwenziwe nguNcube kuzakwenza intengo yempahla ikhuphuke elizweni.
Kodwa uNcube ukusolile lokhu esithi uhlelo lwakhe lolu luzakwenza ukuba uhulumende athole imali yokusekela indleko kwezemfundo, izibhedlela lokunye.
Esinye isakhamuzi seHarare uMnu Liberty Moyo uthi uyethuswa yikuba impilo izakuba nzima kumnyaka ozayo ngemva kokulalela uMthuli ekhuluma.
UNcube wabele isilinganiso samatshumi amabili ekhulwini -20%, kunhlelo zemfundo kuthi izibhedlela zithole imali engaba yisilinganiso sokulitshumi lanhlanu ekhulwini-15% ku-budget ka2024.
Inengi lisola ukuba imali eyethulwe nguNcube ibekwe ngedola le Zimbabwe lona elivele selingasela sisindo. Abanye njalo ngabasola ukuba akazange axoxisane lozulu okweneleyo ngale iBudget yakhe engakayethuleli ilizwe.
Forum