amalinks wokungena

Breaking News

Amasotsha Lamapholisa Abhaxabula Abalandeli beMthwakazi Republic Party Abahoza uMnangagwa


Okunye obekulotshwe ngabalandeli beMthwakazi Republic Party.

Amasotsha lamapholisa atshaye abalandeli bebandla leMthwakazi Republic Party (MRP) abatshengisele eZimbabwe International Trade Fair ngeSonto ngesikhathi uMongameli Emmerson Mnangagwa ekhuleka labalandeli beFamily of God Church ekhokhelwa nguMfundisi Andrew Wutaunashe.

UMnu. Mbonisi Gumbo, isikhulumeli sebandla leMRP, uthe abatshengisele kuleyo ndawo abalitshumi batshaywe baphoselwa ezimoteni zamapholisa lamasotsha bahanjiswa eBrady Baracks lapho abafike babhaxabulwa khona kabuhlungu ngamasotsha.

UGumbo uthe kuthe kusihlwa bathwalwa ngezimota zamapholisa bayatshiywa enkambeni yamapholisa eyeBulawayo Central Police Station lapho abetheswa khona amacala okuphazamisa obekusenziwa eZITF.

“Abatsha laba sebesusiwe eBrady Baracks bahanjiswa enkambeni yeBulawayo Central Police Station. Balimele okumangalisayo. Amapholisa athi azabavalela khonapho abethese amacala okuphazamisa abantu abakade besenkonzweni (eZITF).

“Sesidinga uncedo lokubrlsphisa besenkambeni. Ibandla leZanu PF lenkokheli yalo bazahlawula ngalokhu abakwenzayo. UNkulunkulu ngowethu sonke njalo nguye okhangele konke emhlabeni.”

Kasenelisanga ukukhuluma ngodaba lolu lamapholisa kanye lamasotsha. Abatshengiselayo bathe uMnangagwa ngomunye owaphatheka kumbhuqazwe weGukurahundi kusukela ngomnyaka ka1981 kusiyafika umnyaka ka1987.

Owayengumongameli, uMnu. Robert Mugabe, owancediswa lilizwe leNorth Korea walolonga ibutho leGukurahundi walihambisa eMatabeleland leNkabazwe lapho elabulala khona abantu abacatshangelwaukuthi bafika inkulungwane ezingamatshumi amabili – 20,000 – okuthiwa babesekela abahlamuki ababelwisana lohulumende.

UMugabe wathi abahlamuki laba babengabaka Mnu. Joshua Mqabuko Nkomo. Kodwa-ke uNkomo waphika wemba phansi esithi babezimele bodwa njalo uMugabe wayezama ukuthi ibandla lakhe libe yilo lodwa eZimbabwe.

UNkomo wathi uMugabe wayesesaba ibandla lakhe leZapu elalilebutho elibukhali okumangalisayo ilizwe leZimbabwe lingakatholi uzibuse.

Facebook Forum

XS
SM
MD
LG