amalinks wokungena

UMugabe Uthi Ulakho Ukuguqula Idale leCabinet Ngeviki Ezayo

  • Gibbs Dube

UMongameli Robert Mugabe lomkakhe, uNkosikazi Grace Mugabe.

UMongameli Robert Mugabe uthi ulakho ukuthi asuse ezihlalweni amanye amalunga edale leCabinet ngeviki ezayo.

Inkampani yezindaba eye Reuters ibika ukuthi uMugabe wethule lokhu eHarare ngoMgqibelo emhlanganweni oqoqwe ngabatsha bebandla leZanu PF.

“Ngeviki ezayo silakho ukuthi siguqule isimo sedale lamalunga kahulumende eleCabinet. Kumele sihlale silabo bonke benje kumbe sisuse abanye? Ngizakwenza lokhu ngeviki ezayo lizakuzwa ukuthi ngizakwethulani.”

UMugabe wethule amazi la ngesikhathi abasekeli bakhe, UMnu. Phelekezela Mphoko loMnu. Emmerson Mnangagwa, basanda kuphoselana aqatha kulandela okwethulwe nguMnangagwa othi kukhanya wadla itshefu esemhlanganweni weZanu PF Youth Interface Rally eGwanda, okwamenza wathelelwa esibhedlela eSouth Africa lapho elatshwa khona.

Amadokotela akhe atshele uMugabe ukuthi uMnangagwa kafakelwanga itshefu ekudleni kwakhe.

Inkulumo kaMnangagwa yazondisa uMphoko owayephethe isikhundla sikamongameli ngeviki ephelileyo owacina etshela uMnangagwa ukuthi uqamba amanga.

Lokhu kwasekelwa nguNkosikazi Grace Mugabe owathi uMnangagwa uvele ulambele isikhundla sikaMugabe njalo uqamba amanga ukuthi wafakelwa itshefu ngoba utshela abantu ukuthi uzabulala labo abaphikisana laye ukwenzela ukuthi angene esikhundleni sikaMugabe.

UMugabe uthe lokhu okwenziwa yiziphathamandla zikahulumende emphakathini kululaza ibandla elibusayo.

“Kuyayangisa lokhu elikwenzayo ukuthethisana ebantwini. Ibandla lethu kalakhiwanga ngale indlela. Sesikwazi ukuthi nxa sehlukene siba yikudla kwamangabuzani.”

UMnangagwa loNkosikazi Mugabe kubikwa ukuthi bafuna ukuthatha isikhundla sikaMugabe engasiyekela. UMnangagwa kuthiwa ukhokhela icele lebandla elibusayo okuthiwa yiTeam Lacoste kuthi-ke uNkosikazi Mugabe ulelakhe elibizwa ngokuthi yiGeneration 40.

Ababili laba bayakuphika lokhu.

Facebook Forum

XS
SM
MD
LG